گەولوگتار بايلانىسقا وزدەرى شىققان
اقتوبەدە جوعالعان گەولوگتاردى ىزدەۋ جۇمىستارى اياقتالدى. ولاردىڭ جاعدايى جاقسى، دەپ حابارلايدى Almaty-akshamy.kz.
اقتوبە وبلىستىق تجد باسپا ءسوز قىزمەتىنىڭ اقپاراتىنا سايكەس، ءىز-تۇزسىز جوعالىپ كەتكەن گەولوگتار قىستاقتان تابىلدى.
«بۇگىن ساعات 14:50-دە جوعالىپ كەتكەن گەولوگتار بايلانىسقا شىعىپ، «قيسىقساي» قىستاعىندا ورالاسقاندارى جونىندە حابارلادى. ءقازىر ولاردىڭ جاعدايلارى جاقسى، مەديسينالىق كومەك قاجەت بولمادى. قازىرگى ۋاقىتتا گەولوگتار ايتەكە بي اۋدانىنىڭ قارابۇتاق اۋىلىنا جەتكىزىلۋدە»، - دەپ حابارلادى وبلىستىق تجد باسپا ءسوز قىزمەتى.
ەسكە سالا كەتسەك، 26 قاراشادا 4 گەولوگقا ىزدەۋ جاريالاندى. ولار 25 قاراشادا سوڭعى رەت بايلانىسقا شىعىپ، كەيىن حابار-وشارسىز كەتكەن. ولاردىڭ ىزدەستىرىلۋىنە قۇرامىندا 33 ادام مەن 8 بىرلىك تەحنيكادان تۇراتىن 5 ىزدەۋ توبى جۇمىلدىرىلدى. ال بۇگىن اقتوبە-قۇمساي-قايراقتى-قايىڭدى-ميلىساي-ارالتوعاي باعىتتارى بويىنشا اۆيا ىزدەۋ ءۇشىن تجم «قازاۆياقۇتقارۋ» اق ەۆروكوپتەرى ۇشتى.