قازمۇنايگاز قازىرگى ۋاقىتتا مۇنايدى كاسپيي قۇبىر كونسورسيۋمى جۇيەسىنەن باسقا باعىتتار ارقىلى دا ەكسپورتتاۋدا
«قازمۇنايگاز» ۇلتتىق كومپانياسى ازەربايجان ارقىلى مۇناي تاسىمالداۋ تۋرالى اقپاراتقا تۇسىنىكتەمە بەردى، دەپ حابارلايدى Almaty-akshamy.kz.
«قازمۇنايگاز قازىرگى ۋاقىتتا مۇنايدى كاسپيي قۇبىر كونسورسيۋمى جۇيەسىنەن باسقا باعىتتار ارقىلى دا ەكسپورتتاۋدا. اتاپ ايتقاندا، اتىراۋ-سامارا، سونداي-اق جۇڭگو باعىتىنداعى قازاقستان-قىتاي قۇبىرى، اقتاۋ پورتى (ماحاچكالا/باكۋ) باعىتتارى قولجەتىمدى. سونىمەن قاتار كومپانيا مۇنايدى تاسىمالداۋ باعىتتارىن ءارتاراپتاندىرۋ بويىنشا قوسىمشا جۇمىستار جۇرگىزۋدە. مۇناي تاسىمالداۋدىڭ باسقا دا ءتيىمدى بالاما باعىتتارى قازىرگى ۋاقىتتا پىسىقتالىپ جاتىر»- دەلىنگەن كومپانيانىڭ باسپا ءسوز قىزمەتى تاراتقان اقپاراتتا.
ايتا كەتسەك، الەمدىك Reuters اگەنتتىگىندە قازاقستان ازەربايجان اۋماعىمەن وتەتىن مۇناي قۇبىرلارى ارقىلى جىلىنا 1،5 ميلليون توننا مۇناي ەكسپورتتاۋدى جوسپارلاپ وتىر دەگەن سىڭايدا ماقالا جاريالاندى.
بۇل رەتتە ەنەرگەتيكا ءمينيسترى بولات اقشولاقوۆ قازاقستان باكۋ – تبيليسي – جەيحان مۇناي قۇبىرى ارقىلى 1،5 ملن توننا مۇناي ەكسپورتتاۋدى جوسپارلاپ وتىر دەگەن اقپاراتتى جوققا شىعاردى.
«اقپاراتتىق رەسۋرستا ايتىلىپ جاتقان كولەممەن ءبىزدىڭ ەكسپورتتىق باعىتتاعى پروبلەمانى شەشۋ اقىلعا سىيمايدى. نەگە؟ ويتكەنى، بىرىنشىدەن، اتالعان باعىتپەن 1،5 ملن توننا مۇنايدى ەكسپورتتاۋ قازىرگى احۋالدى ايتارلىقتاي جەڭىلدەتپەيدى. ەكىنشىدەن، ءبىزدىڭ مينيسترلىكتە ءدال مۇنداي كەلىسىمگە قول قويۋ جوسپارى جوق»، -دەدى مينيستر.
ونىڭ ۇستىنە بۇعان دەيىن ق ر پرەزيدەنتى قاسىم-جومارت توقايەۆ مۇناي تاسىمالداۋ ءىسىن ءارتاراپتاندىرۋدى ماڭىزدى مىندەت دەپ اتاپ، ءتيىستى تاپسىرما بەرگەن ەدى.