قازاقستان – سەنىمدى مۇناي مەن گاز جەتكىزۋشى ەل.
جۇڭگو – ەۋروپا ءدالىزى بويىنشا قۇرلىقتاعى ترانزيتتىك تاسىمالدىڭ 80 پايىزدان استامى قازاقستان ارقىلى وتەدى، دەپ حابارلايدى Almaty-akshamy.kz
مەملەكەت باسشىسى قاسىم-جومارت توقايەۆ اق وردا رەزيدەنسياسىندا قازاقستاندا تىركەلگەن شەتەلدىك ديپلوماتيالىق ميسسيا باسشىلارىمەن كەزدەستى.
ق ر پرەزيدەنتى ءوز سوزىندە ءبىزدىڭ ەلدىڭ ەكونوميكالىق الەۋەتىنە، الەمدە تاپشى مۇناي سالاسىنداعى باسىمدىلىعىن اتاپ ءوتتى.
«مۇناي قورىنىڭ كولەمى بويىنشا ەۋرازيادا ەكىنشى ورىن يەلەنەتىنى راستالعان قازاقستان – جاھاندىق ەنەرگەتيكالىق داعدارىس سالدارىن جەڭىلدەتۋ ءۇشىن سەنىمدى مۇناي مەن گاز جەتكىزۋشى ەل»، - دەدى توقايەۆ.
دۇنيەجۇزىلىك بانكتىڭ مالىمەتى بويىنشا، كولىك-ترانزيت الەۋەتىنىڭ دامۋى ورتالىق ازيا ەلدەرىنىڭ تۇتاس ءجىو-ن 15 پايىزعا وسۋىنە ىقپال ەتۋى مۇمكىن ەكەنىن ەسكەرسەك، مەملەكەت باسشىسى «بۇگىندە جۇڭگو – ەۋروپا ءدالىزى بويىنشا قۇرلىقتاعى ترانزيتتىك تاسىمالدىڭ 80 پايىزدان استامى قازاقستان ارقىلى وتەتىنىن» اتاپ ءوتتى.
«ورتا ءدالىز» دەپ اتالاتىن ترانسكاسپيي حالىقارالىق كولىك باعىتىنىڭ ەنەرگەتيكا مەن ازىق-تۇلىك قاۋىپسىزدىگىن قامتاماسىز ەتۋ ىسىندەگى ماڭىزى ارتىپ كەلەدى»، - دەدى پرەزيدەنت.
سونىمەن قاتار، ەل باسشىسى ەلىمىز سيفرلىق ترانسفورماسيانى قولداۋ ءۇشىن رەفورمالار جۇرگىزۋگە كىرىسكەنىن حابارلادى. بۇل جۇمىستاردى بۇكىل الەم مويىنداپ وتىر.
«بۇۇ-نىڭ رەيتينگىسىندە قازاقستان «ەلەكتروندى ۇكىمەتتى» دامىتۋ بويىنشا الەمنىڭ ۇزدىك وتىزدىعىنا كىرەدى، سونداي-اق ونلاين قىزمەت كورسەتۋ يندەكسى بويىنشا 11-ورىندا»، - دەدى مەملەكەت باسشىسى.
قازاقستان الداعى 7 جىلدا 150 ميلليارد دوللار تىكەلەي شەتەل ينۆەستيسياسىن تارتۋدى جوسپارلاپ وتىر.
«قازاقستاننىڭ ۇستانىمى وتە قاراپايىم جانە ايقىن – ءبىز نولدىك سوماسى بار ويىندارعا سەنبەيمىز. ءبىز «ۇلكەن ويىندارعا» ەمەس، ەۋرازيانىڭ جۇرەگىندەگى بارلىق ادامدار ءۇشىن «مول پايداعا» ۇمتىلامىز»، - دەپ ءسوزىن تۇيىندەدى توقايەۆ.