پوليسيا دەپارتامەنتى بانك كارتالارىنىڭ دەرەكتەرىن سايتتارعا ەنگىزۋ ءقاۋىپتى ەكەنىن ەسكە سالادى
اقتوبەلىك الەۋمەتتىك جەلىدەگى جارناماعا الدانىپ، بار جيناعىنان ايىرىلدى. ءتىپتى بەيتانىس ادام نەسيە راسىمدەپ جىبەرگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.
اقتوبە قالاسىنىڭ پوليسيا باسقارماسىنا قالا تۇرعىنى ارىز ءتۇسىردى.
ول مۇناي كومپانياسىنىڭ اكسياسىن ساتۋ تۋرالى جارنامانى كورىپ، سىلتەمە ارقىلى ءوزى تۋرالى دەرەكتەردى قالدىرعان.
كەيىن بەيتانىس ادام بايلانىسقا شىقتى.
بەيتانىس ادام ونىڭ دەرەكتەرىن العان جانە بانكتەردىڭ ءبىرىنىڭ قوسىمشاسى ارقىلى جيناق دەپوزيتىندەگى بار قارجىنى يەمدەنگەن. ءتىپتى نەسيە راسىمدەگەن. شىعىن 16 ميلليون تەڭگەدەن استى.
«وسى وقيعاعا قاتىستى قىلمىستىق كودەكستىڭ «الاياقتىق» بابى بويىنشا قىلمىستىق ءىس قوزعالدى. اقتوبە وبلىسى پوليسيا دەپارتامەنتى بانك كارتالارىنىڭ دەرەكتەرىن سايتتارعا ەنگىزۋ ءقاۋىپتى ەكەنىن ەسكە سالادى. اقشانى كريپتوۆاليۋتاعا، اكسيالارعا، باعالى مەتالدارعا جانە ت.ب. ينۆەستيسيالاۋ ارقىلى ۇلكەن ديۆيدەند ۋادە بەرەتىن كۇماندى جوبالارعا اقشا سالۋعا بولمايدى. ەگەر وسى جولدى تاڭداساڭىز، شولۋ جۇرگىزىپ، پىكىرلەردى وقىپ شىعىڭىز»،- دەيدى اقتوبە وبلىستىق پوليسيا دەپارتامەنتى باسپا ءسوز قىزمەتىنىڭ جەتەكشىسى ەربولات سارقۇلوۆ.