مۇناي باعاسى ارزاندايدى

حالىقارالىق ۆاليۋتا قورى بيىل مۇناي باررەلىنىڭ باعاسى 16،2 پايىزعا ارزانداپ، 81،13 دوللارعا دەيىن تومەندەيدى دەپ بولجادى.

بۇل تۋرالى حۆق-نىڭ دۇيسەنبىدە جاريالانعان جاھاندىق ەكونوميكانىڭ دامۋ پەرسپەكتيۆالارى تۋرالى بايانداماسىنىڭ قاڭتارداعى جاڭارتىلعان مالىمەتىندە ايتىلعان، دەپ حابارلايدى Almaty-akshamy.kz.

«2023 جىلى مۇناي باعاسى شامامەن 16%-عا تومەندەيدى. ال جانارمايعا جاتپايتىن شيكىزات تاۋارلاردىڭ باعاسى ورتا ەسەپپەن 6،3%-عا قۇلدىرايدى. 2022 جىلعى 29 قاراشاداعى فيۋچەرستىك نارىقتاردا ەسەپتەلگەن ورتاشا بولجامدى باعا 2023 جىلى 81،13 دوللار جانە 2024 جىلى 75،36 دوللار بولادى»، - دەلىنگەن مالىمەتتە.

وسىلايشا، كەلەسى جىلى مۇناي باعاسى 7،1 پايىزعا تومەندەيدى.

حۆق-نىڭ پايىمداۋىنشا، ەنەرگيا نارىقتارى ۋكرايناداعى جانجالدان تۋىنداعان (ەكونوميكالىق) جاعدايلارعا تەز بەيىمدەلدى. دەگەنمەن وتكەن جىلى «جاھاندىق ەنەرگيا مەن ازىق-تۇلىك باعاسىنىڭ كۇرت ءوسۋى ءومىر ءسۇرۋ قۇنىنىڭ داعدارىسىن تۋدىردى.

ۋكرايناداعى قاقتىعىسقا بايلانىستى مۇناي، گاز جانە ازىق-تۇلىك باعاسىنىڭ كۇتكەن كورسەتكىشتەن جوعارى بولۋى جالپى ينفلياسيانى قايتا كوتەرۋى مۇمكىن.