الماتىلىقتاردى الداعان الاياق انىقتالدى

ول 29 جاستاعى م. ەسىمدى ەر ادام بولىپ شىقتى.

الماتىدا جەڭىلدەتىلگەن اۆتونەسيە الىپ بەرەمىن دەپ جۇرتتى الداعان الاياق اشكەرە بولدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

الاياق تۇرعىندارعا جەڭىلدەتىلگەن نەسيە بەرۋ باعدارلاماسى بويىنشا اۆتوورتالىقتان كولىك الىپ بەرۋگە ۋادە بەرگەن.

«كۇدىكتى بىرنەشە اي بويى اڭعال ازاماتتاردى الداپ كەلگەن. ولارعا اۆتوورتالىقتان كەزەكسىز، جەدەل تۇردە جانە جەڭىلدەتىلگەن نەسيەگە جاڭا كولىك الۋعا كومەكتەسۋگە ۋادە بەرگەن. قازىرگى ۋاقىتتا كۇدىكتىنىڭ وسىعان ۇقساس ءتورت الداۋ دەرەگىنە قاتىستىلىعى دالەلدەندى. ءتورت ادام پوليسياعا ارىزداندى. ولار كەلتىرىلگەن ماتەريالدىق شىعىندى ءۇش ميلليون تەڭگەگە باعالاعان. الاياقتىق دەرەگىنە سايكەس، ق ر قك-نىڭ 190-بابى 3-بولىگى بويىنشا سوتالدى تەرگەۋ باستالدى»، – دەدى ناۋرىزباي اۋداندىق پوليسيا باسقارماسىنىڭ باستىعى دانيار مەڭدەبايەۆ.

پوليسەيلەر الدانعان ادامداردىڭ بۇدان دا كوپ بولۋى مۇمكىن ەكەنىن جوققا شىعارمايدى. سوندىقتان ءتارتىپ ساقشىلارى وسى ادامنىڭ قىلمىستىق ارەكەتىنەن زارداپ شەككەن ازاماتتاردى مىنا تەلەفون نومىرلەرىنە حابارلاسۋدى سۇرايدى: 8-707-447-07-50 جانە 8-747-699-70-02.