رەسپۋبليكا كۇنىنە وراي "رەسپۋبليكا كۇنى – ۇلتتىق بىرلىك پەن جاڭعىرۋ مەرەكەسى" تاقىرىبىندا "دوڭگەلەك ۇستەل" ءوتتى.
ءىس-شارانىڭ ماقساتى – ەلدىڭ تاۋەلسىزدىگى مەن مەملەكەتتىلىكتىڭ قالىپتاسۋىنداعى رەسپۋبليكا كۇنىنىڭ تاريحي ماڭىزىن دارىپتەۋ، سونداي-اق قازاقستاندىق قوعامداعى بىرلىك پەن جاڭعىرۋ قۇندىلىقتارىن ناسيحاتتاۋ.
"رەسپۋبليكا كۇنى – بۇل ەلىمىزدىڭ تۋعان كۇنى. ءقادىرلى جاستار، بۇل ءارقايسىسىمىز ءۇشىن ەڭ قىمبات، ەڭ ءقادىرلى كۇن بولۋى ءتيىس. ءبىز وسىناۋ تاۋەلسىزدىكتىڭ، بەيبىت ءومىردىڭ ءقادىرىن ءبىلۋىمىز كەرەك. انە، بايقاساڭىزدار، قۋاتتى دەگەن گازانىڭ ءوزى ءبىر كۇننىڭ ىشىندە جەرمەن-جەكسەن بولدى. مىسالى، ول تابيعاتتىڭ اپاتى بولسا، وندا تۇسىنەر ەدىك. وسىنىڭ ءبارى مەملەكەتتەر، ۇلتتار اراسىنداعى تۇسىنبەۋشىلىك، الاۋىزدىقتىڭ كەسىرىنەن. سوندىقتان، جاستار، بىزگە بەيبىت ءومىر، مادەني سانا، جوعارى ءبىلىم كەرەك. ەگەر مەملەكەتىمىز تىنىشتىق قۇشاعىندا بولسا، مادەنيەتىمىز دە، ونەرىمىز دە، عىلىمىمىز دا، ءبارى الەمدىك دەڭگەيگە كوتەرىلە الادى. تاۋەلسىزدىك مىنا وتىرعان وزدەرىڭە امانات، اينالايىندار! بىلىمگە، عىلىمعا ۇمتىلىڭدار، ءتىل بىلىڭدەر. سوندا سەندەر المايتىن قامال بولمايدى"، – دەدى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ پروفەسسورى، تاريح عىلىمىنىڭ دوكتورى عيزاتتۋللا حاليدۋللين.
"دوڭگەلەك ۇستەل" باسىنداعى اڭگىمەدە تاريح عىلىمدارىنىڭ دوكتورى حانزادا سۋتيەۆا، اعا وقىتۋشى، ماگيستر مەدەت ازانبايەۆ، گۋمانيتارلىق عىلىمدارىنىڭ ماگيسترى گۇلجانات عابدۋلاحمەت قىزى مەن "امانات" پارتياسى الاتاۋ اۋداندىق فيليالىنىڭ ءتورايىمى جارقىنگۇل الدامبەرگەنوۆا دا وي-پىكىرلەرىن ورتاعا سالدى.
كەشتە ونەرلى جاسوسىپىرىمدەردەن قۇرالعان "الاش" ءانسامبلى مەن "دارا تۇمار" ورتالىعىنىڭ وقۋشىلارى ونەر كوسەرتتى. جينالعاندار "ەركە سىلقىم"، "كونە تاراز"، "اقارال"، "اكە تولعاۋى" سىندى كۇيلەردى تىڭداپ، قول سوعىپ، ورەندەرگە شىعارماشىلىق تابىس تىلەدى.