پرەزيدەنت رەسپۋبليكا كۇنىنە ارنالعان سالتاناتتى جيىندا ءسوز سويلەدى، - دەپ حابارلايدى aqshamnews.kz ءتىلشىسى.
"زاڭعار ويشىل ءابىش كەكىلبايەۆ "وتكەننەن تاعىلىم، ەرتەڭنەن ءۇمىت ىزدەگەندەر عانا ىلگەرى باسا الادى" دەگەن. ءبىز ءار كەزەڭدە ۇلت تاريحىندا وشپەس ءىز قالدىرعان بارلىق مەملەكەت جانە قوعام قايراتكەرلەرىنە قۇرمەت كورسەتەمىز، ولاردى ەشقاشان ۇمىتپايمىز.
سونىمەن بىرگە كەلەشەككە ۇلكەن ۇمىتپەن، زور سەنىممەن قارايمىز، بيىك ماقساتتارعا ۇمتىلامىز. وسى جىلداردا ەلىمىزدىڭ باعىندىرعان بەلەستەرى از ەمەس. ءبىز جەر جۇزىنە ەگەمەن مەملەكەت رەتىندە تانىلدىق. شەكارامىزدى شەگەندەپ، ىرگەمىزدى بەكىتىپ، قاۋىپسىزدىگىمىزدى قامتاماسىز ەتتىك. بىرلىگىمىزدى بەكەمدەپ، تاتۋلىق پەن تۇراقتىلىقتىڭ ارقاسىندا ءتۇرلى سىناقتاردان سۇرىنبەي وتتىك. بۇگىندە جاھان جۇرتى ەلىمىزدىڭ وسىپ-وركەندەپ كەلە جاتقانىنا كۋا بولىپ، ءوز قۇرمەتىن كورسەتۋدە.
الايدا كەمشىلىكسىز، ءمىنسىز جۇمىس بولمايتىنى انىق. ءبىز وتكەننەن ساباق الىپ، ەشكىمگە جالتاقتاماي، ءوز جولىمىزبەن ءجۇرىپ كەلەمىز.
سوڭعى جىلدارى حالىقتىڭ ءال-اۋقاتىن ارتتىرۋ ءۇشىن اسا ماڭىزدى قادامدار جاسالدى. 2019 جىلى اۋقىمدى رەفورمالار قولعا الىندى. قازاقستان جاڭا تۇرپاتتى ەل بولۋ جولىنا ءتۇستى.
جالپىحالىقتىق رەفەرەندۋم ارقىلى اتا زاڭىمىزعا تۇزەتۋلەر ەنگىزىلدى. پارلامەنتتىڭ قۇزىرەتى كەڭەيدى، ۇكىمەتتىڭ جاۋاپكەرشىلىگى ارتتى. كونستيتۋسيالىق سوت قۇرىلدى. ادام قۇقىقتارى جونىندەگى ۋاكىل ينستيتۋتى كونستيتۋسيالىق مارتەبەگە يە بولدى. بيىل شىلدە ايىنان باستاپ كاسساسيالىق سوت جۇيەسى ىسكە قوسىلدى، بۇل قوعامىمىزدا ادىلەتتىلىكتى كۇشەيتۋگە جاعداي جاسادى".