قازاقستاننىڭ حالىق جازۋشىسى تۋعان ەلىنە نەبارى 6 ساعاتتىق جەرگە قونىس اۋداردى
مۇحتار ماعاۋين تۇركيانىڭ كەمەر قالاسىندا تۇرىپ جاتىر، دەپ حابارلايدى Almaty-akshamy.kz.
بۇل تۋرالى Facebook الەۋمەتتىك جەلىسىندە جازۋشى، جۋرناليست قورعانبەك امانجول سۇيىنشىلەپ حابارلادى. الەۋمەتتىك جەلى قولدانۋشىلارى بۇل جاڭالىققا جاقسى لەبىزدەرىن ءبىلدىرىپ، جازۋشىنىڭ ەلگە ورالۋىنا تىلەكسەتىستىك ءبىلدىرىپ جاتىر. Facebook-تەگى بۇل اقپاراتپەن جازۋشىنىڭ كەلىنى التىن ماعاۋينا دا بولىسكەن ەكەن.
ەستەرىڭىزگە سالا كەتەيىك، جازۋشى مۇحتار ماعاۋين بۇعان دەيىن امەريكا قۇراما شتاتتارىندا تۇردى. ال وعان دەيىن قالامگەر 2007 جىلى چەحياعا قونىس اۋدارعان بولاتىن.
ماعاۋين ءوز وتانىنان كەتىپ، شەت ەل اسۋىنىڭ سەبەبىن بىلاي تۇسىندىرگەن ەدى:
«قازاقتا «ارقادا قىس جايلى بولسا، ارقار اۋىپ نەسى بار»دەگەن ءسوز بار. مەن باياعى ورىستىڭ ديسسيدەنتىن وتىرعىزىپ، جەلكەلەپ شىعارىپ سالعانداي جاعدايدى باستان كەشكەم جوق، مەن ءوزىم كەتتىم. تىنىش جۇمىس ىستەۋ كەرەك. ادەبيەتتە ءارتۇرلى داۋ-داماي بولادى. اۋەزوۆ تە، ماعجان دا سىنعا ۇشىراعان. الايدا ماعان قارسى ۇلكەن ناۋقان ءجۇردى. مىسالى سونداي وتىرىكتىڭ ءبىرى «جۇلدىز» جۋرنالىنىڭ 2006 جىلعى 9 نومىرىندە «مۇحاممەد پايعامباردىڭ ايەلى ايشا انامىزعا ءتىل تيگىزگەن پوۆەست باسىلدى» دەپ جازىلدى. جۇرتتىڭ ءبارى ىزدەدى، جوق ونداي نارسە، جۋرنال جاڭا عانا شىققان. شىققانىنا اي بولماعان. سول سياقتى نارسەلەر. ونىڭ ءبارىنىڭ جازۋىما ەشقانداي اسەرى بولعان جوق. ءبىراق ماعان تىنىشتىق كەرەك، حالقىڭا كەرەك بولماساڭ، بولاشاق ۇرپاققا كەرەكسىڭ، سودان كەيىن سىرتقا كەتۋگە تۋرا كەلدى...مەنىڭ ۇكىمەتكە دە، باسقالارعا دا ەشقانداي وكپەم جوق، وكپەلەيتىن ولاردىڭ جاعدايى دا جوق»