قازاقستاندا مەديسينالىق ۇيىمدار مەديسينالىق-الەۋمەتتىك ساراپتاماعا جىبەرەتىن ازاماتتاردى سىرتتاي پرواكتيۆتى فورماتتا كۋالاندىرۋعا تاۋەلسىز ساراپشىلاردى تارتۋ بويىنشا پيلوتتىق جوبا باستالدى.
ق ر الەۋمەتتىك كودەكسىندە 2025 جىلعى 1 قاڭتاردان باستاپ تاۋەلسىز ساراپشىلار ينستيتۋتىن تولىق كولەمدە ەنگىزۋ كوزدەلگەن، دەپ حابارلايدى aqshamnews.kz.
بيىل ءساۋىر ايىندا ازاماتتاردى كۋالاندىرۋ پروسەسىنە تاۋەلسىز ساراپشىلاردى ەنگىزۋ تەتىگىن سىناقتان وتكىزۋ ءۇشىن ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ، سيفرلىق دامۋ، يننوۆاسيالار جانە اەروعارىش ونەركاسىبى مينيسترلىكتەرى بىرلەسكەن بۇيرىق قابىلدادى. ول ۇمىتكەرلەردىڭ تەستىلەۋدەن ءوتۋ جانە تالاپ ەتىلەتىن قۇجاتتار توپتاماسىن ۇسىنۋ ءتارتىبىن رەتتەيدى. نەگىزگى تالاپتاردىڭ ءبىرى جوعارى مەديسينالىق ءبىلىم، دەنساۋلىق ساقتاۋ سالاسىنداعى مامان سەرتيفيكاتىنىڭ بولۋى، سونداي-اق مەديسينالىق-الەۋمەتتىك ساراپتاما جۇرگىزۋ ماسەلەلەرى بويىنشا سوڭعى 5 جىلدا وقۋدان وتكەنىن راستايتىن قۇجات بولۋى. وسىلايشا، تاۋەلسىز ساراپشىلاردى ىرىكتەۋ بىلىكتىلىك دەڭگەيى مەن جۇمىس ءوتىلى ەسكەرىلە وتىرىپ، كونكۋرستىق نەگىزدە جۇزەگە اسىرىلاتىن بولادى.
ماس-كە تاۋەلسىز ساراپشىلاردى تارتۋ بويىنشا پيلوتتىق جوبانى ىسكە قوسۋ شەڭبەرىندە كونكۋرسقا 50-گە جۋىق ادام قاتىستى. ىرىكتەۋدىڭ بارلىق كەزەڭدەرىنەن 18 ساراپشى دارىگەر ءوتىپ، جۇمىسقا كىرىستى.
ساراپتاما مىناداي تۇردە جۇرگىزىلەدى: مەديسينالىق قۇجاتتار مەملەكەتتىك ورگاندار مەن دەنساۋلىق ساقتاۋ مينيسترلىگىنىڭ اقپاراتتىق جۇيەلەرىنەن الىنعان دەرەكتەر نەگىزىندە ساراپشىعا اۆتوماتتى تۇردە ەلەكتروندىق جانە يەسىزدەندىرىلگەن تۇردە تۇسەدى.
ىستەردى ءبولۋ ەكساۋماقتى تارتىپپەن جۇزەگە اسىرىلادى. بۇل الماتىدا تۇراتىن ساراپشىعا الماتىدان باسقا ەلىمىزدىڭ وزگە وڭىرلەرىنەن قۇجاتتار كەلىپ تۇسەتىنىن بىلدىرەدى.
تاۋەلسىز ساراپشىلار ينستيتۋتىن ەنگىزۋ ازاماتتاردىڭ ساراپشىلارمەن جانە تيىسىنشە سىبايلاس جەمقورلىق قۇرامداس بولىكتەرىمەن تىكەلەي بايلانىسىن بولدىرماۋعا باعىتتالعان.
مەديسينالىق-الەۋمەتتىك ساراپتاما راسىمدەرىن جۇرگىزگەننەن كەيىن، مۇگەدەكتىك توبى انىقتالعان كەزدە، ءتيىستى الەۋمەتتىك تولەمدەر مەن ارناۋلى الەۋمەتتىك قىزمەتتەردى ودان ءارى تاعايىنداۋ ءوتىنىش بەرۋشىنىڭ قاتىسۋىنسىز پرواكتيۆتى تۇردە جۇرگىزىلەدى.
ەستەرىڭىزگە سالا كەتەيىك، ءماس وتكىزۋدىڭ سىرتتاي فورماتى بويىنشا پيلوتتىق جوبا 2022 جىلدىڭ 1 قاڭتارىنان باستاپ قازاقستاننىڭ بارلىق اۋماعىندا سىناقتان ءساتتى وتۋدە. بۇگىنگى كۇنى سىرتتاي پرواكتيۆتى فورماتتا كۋالاندىرۋ 30 نوزولوگيالىق نىسان بويىنشا جۇرگىزىلەدى. جىل باسىنان باستاپ رەسپۋبليكانىڭ بارلىق وڭىرلەرىندە 60،4 مىڭنان استام ءوتىنىم قارالدى.