وكلەند تەحنولوگيالىق ۋنيۆەرسيتەتىنىڭ جانە ۋاشينگتون جوعارعى وقۋ ورنىنىڭ دەنساۋلىق كورسەتكىشى جانە دەنساۋلىقتى باعالاۋ ينستيتۋتىنىڭ عالىمدارى بۇكىل الەمدە ينسۋلت العاندار سانىنىڭ ارتقانىن انىقتادى، دەپ حابارلايدى aqshamnews.kz.
بۇل جايىندا islam.kz پورتالى The Lancet Neurology مەرزىمدى باسىلىمىنا سىلتەمە جاساي وتىرىپ ءمالىم ەتەدى.
1990 جىلدان 2021 جىلعا دەيىن ينسۋلتكە شالدىققاندار سانى 70 پايىزعا، ال ينسۋلتتان قايتىس بولعاندار قاراسى 44 پايىزعا وسكەن. 2021 جىلى ينسۋلت جۇرەكتىڭ يشەميالىق اۋرۋى مەن COVID-19-دان كەيىنگى الەمدەگى ءولىم-جىتىمنىڭ ءۇشىنشى سەبەبىنە اينالدى. ينسۋلت اۋىرتپالىعىنىڭ وسۋىنە ىقپال ەتەتىن ماڭىزدى فاكتورلارعا ساراپشىلار حالىقتىڭ قارتايۋ پروسەسى مەن اتالعان دەرتتىڭ الدىن الۋعا بولاتىن ءقاۋىپ فاكتورلارى اسەرىنىڭ ارتۋىن جاتقىزىپ وتىر. بۇل باعىتتاعى تالداۋ بارىسىندا 1990–2021 جىلداردى قامتيتىن جاھاندىق اۋىرتپالىق (GBD) زەرتتەۋىنىڭ دەرەكتەرىن پايدالاندى. زەرتتەۋشىلەر دەنە سالماعىنىڭ جوعارى يندەكسى (BMI)، قان قىسىمى، قان قۇرامىنداعى قانت دەڭگەيى جانە اۋانىڭ لاستانۋى سياقتى ءقاۋىپ فاكتورلارىنىڭ اسەرىن دە ەسكەردى. ارتىق سالماق پەن قان قىسىمى جانە اۋانىڭ لاستانۋى ينسۋلت الۋ قاتەرىن ارتتىراتىن نەگىزگى فاكتورلارعا اينالعان.