2023 جىلدىڭ باسىنان باستاپ الەۋمەتتىك قىزمەتتەر پورتالى (بۇدان ءارى – پورتال) ارقىلى شامامەن 428،1 مىڭ مۇگەدەكتىگى بار ادام وڭالتۋدىڭ تەحنيكالىق قۇرالدارىن (بۇدان ءارى – وتق)، 7،5 مىڭ – ىمداۋ ءتىلى قىزمەتىن، 25،5 مىڭ – جەكە كومەكشىنىڭ، 77،2 مىڭ – ساناتورلىق-كۋرورتتىق ەمدەۋ قىزمەتىن الدى.
پورتال مۇگەدەكتىگى بار ادامدارعا وڭالتۋدىڭ تەحنيكالىق قۇرالدارى مەن قىزمەتتەرىن ءوندىرۋشىنى جانە جەتكىزۋشىنى ءوز بەتىنشە تاڭداۋعا مۇمكىندىك بەرەدى، دەپ حابارلايدى Almaty-akshamy.kz.
كومەك تۇرىنە تاپسىرىس بەرۋ كورسەتىلەتىن قىزمەتتى الۋشىنىڭ ەلەكتروندىق سيفرلىق قولتاڭباسىمەن راستاۋ ارقىلى جۇزەگە اسىرىلادى. تاپسىرىس بەرىلگەن وڭالتۋدىڭ تەحنيكالىق قۇرالدارىن جەتكىزۋ نەمەسە ءوز بەتىنشە اكەتۋ ارقىلى الۋعا بولادى.
مۇگەدەكتىگى بار ادامداردى وڭالتۋ قۇرالدارىمەن قامتاماسىز ەتۋ پروتەزدىك-ورتوپەديالىق، سۋردوتەحنيكالىق، تيفلوتەحنيكالىق جانە گيگيەنالىق قۇرالدار، سونداي-اق كرەسلو-اربالار بەرۋدى قامتيدى.
بۇگىنگى كۇنى پورتالدا 869 ارناۋلى الەۋمەتتىك قىزمەتتەر كورسەتەتىن ورتالىق (بولىمشەلەر)، 531 وتق جەتكىزۋشى، 28 مىڭنان استام جەكە كومەكشى، 714 ىمداۋ ءتىلى جانە 106 ساناتورلىق-كۋرورتتىق ەمدەۋ قىزمەتتەرىن ۇسىنۋشى تىركەلگەن.
«الەۋمەتتىك قىزمەتتەر پورتالى» اۆتوماتتاندىرىلعان اقپاراتتىق جۇيەسىن ەنگىزۋ مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار شەڭبەرىندە قاراستىرىلعان.
بۇعان دەيىن حابارلانعانداي، ق ر الەۋمەتتىك كودەكسىن ىسكە اسىرۋ شەڭبەرىندە جەرگىلىكتى اتقارۋشى ورگاندار جانىنان قۇرىلعان پورتال بويىنشا كوميسسيالارعا جاڭا وكىلەتتىكتەر بەرۋ كوزدەلەدى. ولار مۇگەدەكتىگى بار ادامداردىڭ ساپاسىز تاۋار نەمەسە قىزمەت تۋرالى ءوتىنىشىن 5 كۇن ىشىندە قابىلداۋ جانە قاراۋ، انىقتالعان كەمشىلىكتەردى تۇزەتۋ مەرزىمدەرىن كورسەتە وتىرىپ، ءونىم بەرۋشىگە حات جولداۋ جانە ونىڭ ورىندالۋىن باقىلاۋ؛ ءونىم بەرۋشىنى پورتالدان شىعارۋ جانە جوسىقسىز ءونىم بەرۋشىلەر تىزىمىنە ەنگىزۋ تۋرالى شەشىم قابىلداۋ.
پورتالدى پايدالانۋ بويىنشا كونسۋلتاسيالاردى قولداۋ بايلانىس ورتالىعىنان، ياعني 1414 ءبىرىڭعاي ءنومىرى ارقىلى حابارلاسۋعا بولادى.