مۇگەدەكتەر مۇڭىن كىم تىڭدايدى؟

مۇمكىندىگى شەكتەۋلى ازاماتتاردىڭ قۇقىعىن قامتاماسىز ەتۋ ءالى تولىققاندى شەشىلمەي كەلەدى.

وسى رەتتە مۇگەدەكتەرگە قاتىستى كەيبىر قوعامدىق ۇيىم وكىلدەرىنىڭ باسشىلارى مۇگەدەكتەر ماسەلەسىن تۇبەگەيلى شەشۋ ءۇشىن مەملەكەت تاراپىنان ارنايى ورگان كەرەك ەكەندىگىن العا تارتادى، دەپ حابارلايدى Almaty-akshamy.kz

حالىقارالىق تاجىريبەنى قاراپ وتىرساق، وركەنيەتتى ەلدەردىڭ كوبىندە تىكەلەي مۇگەدەكتەر ماسەلەسىمەن اينالىساتىن ارنايى مەملەكەتتىك ورگاندار بار. ولار باسقا سالامەن ەمەس، ناقتى وسى مۇگەدەكتەردىڭ ماسەلەسىمەن اينالىسادى. ال بىزدە ءقازىر بۇل ەڭبەك جانە حالىقتى الەۋمەتتىك قورعاۋ مينيسترلىگىنىڭ قۇزىرىندا بولعانىمەن، ولار مۇگەدەكتەردىڭ ماسەلەسىن تولىق شەشە المايدى. سەبەبى، ولاردىڭ مۇگەدەكتەردەن باسقا دا جۇمىستارى جەتىپ-ارتىلادى. ەڭبەك جانە ەڭبەكاقى تولەۋ، جۇمىسپەن قامتۋ، زەينەتاقىمەن قامسىزداندىرۋ دەگەن سەكىلدى جۇمىستارى تولىپ جاتىر. قازىرگى تاڭدا ەلىمىزدە مۇگەدەكتەر ماسەلەسىن تەك قوعامدىق ۇيىمدار عانا جان-جاقتى كوتەرىپ ءجۇر. الايدا، مۇگەدەكتەر ءالى كۇنگە دەيىن وزدەرىن قوعامنىڭ تولىققاندى مۇشەسى رەتىندە سەزىنە الماي كەلەدى. ويتكەنى، كوپشىلىك جەردە ءۇيدىڭ اينالاسىنان باستاپ، قوعامدىق كولىك پەن كەڭسەلەرگە دەيىن مۇگەدەكتەرگە ەشقانداي جاعداي جاسالماعان.

عيماراتتاردىڭ بارلىعىندا دەرلىك مۇگەدەكتىك اربامەن جۇرەتىن جولدار مەن قوندىرعىلار ورناتىلماعان. كەڭەس كەزىندە كوپتەگەن قالالاردا باعدارشامدار قىزىل جانىپ تۇرعاندا ارنايى دىبىس بەرەتىن سيگنالدار ورناتىلۋشى ەدى. ءقازىر ول جوق. قوعامدىق كولىكتەر مۇگەدەكتەردىڭ مىنىپ-تۇسۋىنە قاجەتتى جابدىقپەن جابدىقتالماعان. تۇرعىن ءۇي كەشەندەرىن، عيماراتتاردى سالاردا مۇگەدەكتەردىڭ جاعدايى ەسكەرۋسىز قالعان. ەندى مۇنىڭ بارلىعىن رەتكە كەلتىرۋ ءۇشىن نە ىستەۋ كەرەك؟ قۇرىلىس كومپانيالارى بيىك عيماراتتار سالىپ جاتقاندا مۇگەدەكتەر «مۇنى ماعان ىڭعايلى ەتىپ سال» دەپ ايتا الا ما؟ شىندىعىنا كەلسەك، مۇگەدەكتەردىڭ سوزىنە ولار پىسقىرىپ تا قارامايدى. سوندىقتان مۇگەدەكتەردىڭ ماسەلەسىمەن اينالىساتىن ارنايى ورگان بولاتىن بولسا، ولار ايىپپۇل سالادى، ەگەر تىڭداماسا، سوتقا بەرەدى، ايتەۋىر، مەملەكەتتىك ورگان بولعاننان كەيىن قولىندا كۇش بار، سول ارقىلى شەشە الادى. ءتىپتى كەرەك بولسا، مۇنداي قۇرىلىم تىكەلەي پرەزيدەنتكە نەمەسە ۇكىمەتكە باعىنۋى ءتيىس.

ال ءقازىر مۇگەدەكتەر ماسەلەسىمەن مينيسترلىك اينالىسقانىمەن، ولاردىڭ مۇگەدەكتەر بولىمىندە جۇمىس ىستەيتىن كادر از. ولار بۇكىل قازاقستان مۇگەدەكتەرىنىڭ جاعدايىن جاساي الا ما؟ نەمەسە مينيسترلىكتىڭ ءار ايماقتاعى باسقارمالارىندا مۇگەدەكتىكپەن اينالىساتىن ەكى-ۇش ادام نە تىندىرا الادى؟

ءقازىر كەيبىرەۋلەر «مۇگەدەكتەرگە مەملەكەتتىك قۇرىلىم نەگە كەرەك، ونسىز دا مينيسترلىك بار، ءتۇرلى قوعامدىق ۇيىمدار بار، ەندى تاعى دا مەملەكەتتىك ورگان اشىپ، اقشا شىعىنداۋدىڭ كەرەگى نە؟» دەپ جاتادى. «قىرۋار قارجىنى جەلگە شاشقانشا، ودان دا ول قاراجاتتى مۇگەدەكتەرگە بەرۋدىڭ تەتىگىن قاراستىرايىق» دەيدى. جارايدى، ول قارجىنى مۇگەدەكتەرگە بەرەيىك. ءبىراق ولار ونى نە ىستەيدى؟ مۇمكىندىگى شەكتەۋلى جاندار مۇگەدەكتەردىڭ عيماراتتارعا، قوعامدىق كولىكتەرگە كىرىپ-شىعۋىن، باعدارشامدارعا سيگنال قوندىرعىلارىن ورناتا الا ما؟ جوق. سوندىقتان مۇنىمەن اينالىساتىن ارنايى مەملەكەتتىك ورگان قاجەت. سوندا مۇگەدەكتەر ماسەلەسىندە ءبىرشاما پروبلەمالار شەشىلگەن بولار ەدى.

تىم بولماسا، مينيسترلىكتىڭ ىشىندەگى مۇگەدەكتەر ماسەلەسىمەن اينالىساتىن شتاتتى كوبەيتىپ، ولاردىڭ قۇزىرەتىن كەڭەيتىپ، جۇمىس ىستەۋىنە جاعداي جاسايىق. قۇزىرەتى كۇشەيسە، ولار قوعامدىق ۇيىمدارمەن بىرلەسىپ جۇمىس ىستەسە، ولاردىڭ كوتەرگەن ماسەلەلەرى ەسكەرىلىپ، شەشۋ جولدارىن ۇكىمەت بىرلەسىپ اتقارسا قانداي تاماشا بولار ەدى. ەڭ بولماسا، سول بار ورگاننىڭ ءوزىنىڭ جۇمىسىن ءتيىمدى ەتىپ، مۇگەدەكتەرگە جاعداي جاساي الساق قانەكي.

وكىنىشكە قاراي، ءقازىر مۇگەدەكتەردىڭ ماسەلەسى شاش-ەتەكتەن. ولاردىڭ الاتىن جاردەماقىلارى ماردىمسىز، ارنايى جۇمىسپەن قامتىلىپ وتىرعان جوق، ءتىپتى كوپ عيماراتتاردا ليفتىلەر جوق بولعاندىقتان، مۇگەدەكتەر ۇيلەرىنەن شىعا الماي قامالىپ وتىر. مۇنى بىلدەي ءبىر مينيسترلىك شەشە الماۋدا. سوندىقتان ولاردىڭ قۇزىرەتىن كەڭەيتىپ، تالاپتى كۇشەيتىپ، قاداعالاۋدى قاتاڭداتقانىمىز دۇرىس. ءقازىر كوزى كورمەيتىن مۇگەدەكتەرگە ارنايى كومەكشى بەكىتىلمەگەن، ولاردى قاسىندا ءبىر ادام جەتەكتەپ جۇرمەسە قالاي جۇرەدى؟ ساناتورييلەرگە بارايىن دەسە، اپارىپ-اكەلەتىن ەشكىم جوق. ءقازىر ولار تاعدىردىڭ تاۋقىمەتىن تارتىپ، ۇيلەرىندە وتىر. ءقازىر بىزدە مۇمكىندىك بار، قارجى بار، ءبىراق ونى ءتيىمدى پايدالانۋدىڭ جولدارىن قاراستىرعانىمىز ءجون. ەگەر ارنايى ورگان قۇرىلىپ، مۇگەدەكتەر ماسەلەسىمەن تىكەلەي اينالىساتىن شتاتتار كوبەيسە، ولار قوعامدىق ۇيىمدارمەن بىرىگىپ جۇمىس ىستەپ، ناقتى ماسەلەلەرىن ءتيىستى ورگاندارعا جەتكىزە بىلسە، وسىنىڭ وزىندە-اق كوپ جۇمىستاردى تىندىرۋعا بولادى.

قازاقستان تورتكۇل دۇنيەگە تانىمال ەل اتانىپ جاتىر. بىرەۋ قىزعانىپ قارايدى، بىرەۋ قىزىعىپ قارايدى. الەۋەتى وسىنداي دەڭگەيگە جەتكەن ەل ءۇشىن مۇگەدەك جاندارعا قاتىستى پروبلەمانى دۇرىس شەشە الماۋىمىز ەلدىگىمىزگە سىن ەمەس پە؟ مويىنداۋ كەرەك، جوعارىداعى ايتىلعان پىكىرلەردىڭ ءارقايسىسى وزىنشە وي سالادى. ال ءبىزدىڭ ويىمىزشا، بۇل ماسەلەدەن داۋ تۋىنداتپاي، قۇزىرلى مينيسترلىك ءبىر جاعادان باس، ءبىر جەڭنەن قول شىعارا وتىرىپ، اۋىزبىرشىلىكپەن بىرىگە شەشسە، ءبىز المايتىن قامال جوق.