الماتىداعى اسكەري-تەحنيكالىق مەكتەپتىڭ كۋرسانتتارى سىرقات بالالارعا كومەك كورسەتتى

شاراعا 19 كۋرسانت قاتىستى.

قورعانىس مينيسترلىگى اسكەري-تەحنيكالىق مەكتەبى الماتى فيليالىنىڭ ۇجىمى «ءومىر سۇرۋگە ءۇمىت سىيلا» اكسياسىن ۇيىمداستىرىپ، وقۋ ورنىنىڭ تاربيەلەنۋشىلەرى اۋىر سىرقات بالالارعا ءوز ەرىكتەرىمەن قان تاپسىردى، دەپ حابارلايدى Almaty-akshamy.kz.

اكسياعا 19 كۋرسانت قاتىسىپ، مەديسينالىق تەكسەرۋدەن وتكەننەن كەيىن 7 500 ميلليليتردەن استام قان تاپسىردى.

«دونور بولۋ – ازاماتتىق پارىزىم. ونىڭ ءتىپتى دەنساۋلىققا دا پايداسى زور. دەنساۋلىعىم جاقسى، سالاۋاتتى ءومىر سالتىن ۇستانامىن. دۇرىس تاماقتانۋعا تىرىسامىن. ەگەر مەن تاپسىرعان قان بىرەۋدىڭ ءومىرىن امان الىپ قالۋعا جاراسا، مەن وعان شىن جۇرەكتەن قۋانامىن»، – دەدى مەكتەپ كۋرسانتى جارىمحان داستان.

ۇيىمنىڭ قايىرىمدىلىق قىزمەتىنىڭ ماقساتى – ۇزدىك داستۇرلەردى، ۇرپاقتار ساباقتاستىعىن ساقتاۋ جانە دامىتۋ، وسكەلەڭ ۇرپاقتى پاتريوتيزم مەن وتاندى سۇيۋگە تاربيەلەۋ، ادامگەرشىلىك پەن مەيىرىمدىلىككە باۋلۋ.

وسىنداي يگى ىستەر اسكەري-تەحنيكالىق مەكتەپتىڭ داستۇرىنە اينالدى. دونورلىق قان تاپسىرۋعا جۇيەلى قاتىسۋدان باسقا مەكتەپ تاربيەلەنۋشىلەرى ارداگەرلەرگە قامقورلىق جاساۋ جانە اسكەرگە شاقىرىلۋعا دەيىنگى جاستارمەن كەزدەسۋلەر وتكىزىپ تۇرادى. تاربيەلەنۋشىلەردىڭ باستاماسى بويىنشا وقۋ جىلىنىڭ باسىندا تىرەك-قيمىل اپپاراتى بۇزىلعان بالالارعا ارنالعان مەكتەپ-ينتەرنات وقۋشىلارىنا كومەك كورسەتىلدى، سونداي-اق وقۋ ورنىنىڭ اۋماعى اباتتاندىرىلدى. بۇل اكسياعا اسكەري-تەحنيكالىق مەكتەپتىڭ 30-دان استام كۋرسانتى قاتىستى.