«ۇزدىك پەداگوگ» 3،4 ميلليون تەڭگە سىياقى الادى
ق ر وقۋ-اعارتۋ مينيسترلىگى 2023 جىلعى 21 شىلدەدەگى بۇيرىعىمەن "ۇزدىك پەداگوگ" اتاعىن يەلەنۋشىلەرگە سىياقى تولەۋ مولشەرى قاعيدالارىن بەكىتتى.
سىياقى مولشەرى 1000 ەسەلەنگەن اەك مولشەرىنە (نەمەسە 2023 جىلعا 3 450 000) تەڭ.
سىياقىعا ءتيىستى قارجى جىلىنا ءبىلىم بەرۋ سالاسىنداعى ۋاكىلەتتى ورگانعا كوزدەلگەن بيۋدجەت قاراجاتى ەسەبىنەن تولەنەدى، سونداي-اق، ءبىر رەت اتاق يەگەرىنىڭ شوتىنا اۋدارىلادى.
سىياقىنى الۋ ءۇشىن مۇعالىمدەر كونكۋرس ناتيجەلەرى جاريالانعان كۇننەن باستاپ 5 جۇمىس كۇنى ىشىندە ۋاكىلەتتى ورگانعا قولما-قول نەمەسە ەلەكتروندى فورماتتا مىناداي قۇجاتتار ۇسىنادى:
- جەكە باسىن كۋالاندىراتىن قۇجاتتىڭ كوشىرمەسى؛
- يەگەردىڭ تاڭداۋى بويىنشا ەكىنشى دەڭگەيدەگى بانكتەردە اشىلعان اعىمداعى شوتتىڭ ءنومىرى تۋرالى مالىمەتتەر.
قۇجاتتار تولىق جانە سەنىمدى بولعان جاعدايدا، ولار كەلىپ تۇسكەن كۇننەن باستاپ كۇنتىزبەلىك 15 (ون بەس) كۇننەن كەشىكتىرمەي سىياقى يەگەردىڭ اعىمداعى شوتىنا اۋدارىلادى.
"ۇزدىك پەداگوگ" اتاعى جىل سايىن مۇعالىمدەرگە كونكۋرستىق نەگىزدە بەرىلەدى.
كونكۋرسقا ءبىلىم بەرۋ ۇيىمدارىنىڭ شتاتتىق وقىتۋشىسى بولىپ سانالاتىن جانە كونكۋرسقا قاتىسۋ ءۇشىن قۇجاتتاردى تاپسىرۋ ساتىندە كەمىندە بەس جىل ۇزدىكسىز پەداگوگيكالىق ءوتىلى بار ءبىلىم بەرۋ ۇيىمدارىنىڭ پەداگوگتارى قاتىسادى.
بايقاۋ جىل سايىن ءۇش كەزەڭدە وتكىزىلەدى:
- I كەزەڭ – اۋداندىق، قالالىق (وبلىستىق، رەسپۋبليكالىق ماڭىزى بار قالالار) دەڭگەي؛
- II كەزەڭ – وبلىستىق (رەسپۋبليكالىق ماڭىزى بار قالالار مەن استانا) دەڭگەي؛
- III كەزەڭ – رەسپۋبليكالىق دەڭگەي.
ايتا كەتەيىك، "ۇزدىك پەداگوگ" اتاعى ءبىر وقىتۋشىعا ون جىلدا ءبىر رەتتەن ارتىق بەرىلمەيدى.
بۇيرىق 2023 جىلعى 12 تامىزدان باستاپ قولدانىسقا ەنگىزىلەدى.