بيىل 25 اكىمشىلىك ءىس قوزعالعان.
"پەداگوگ مارتەبەسى تۋرالى" زاڭنىڭ ارقاسىندا قازاقستاندا مۇعالىمدەردىڭ قۇقىقتارىن بۇزۋ سانى ايتارلىقتاي ازايدى، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
مىسالى، 2021 جىلى ءبىلىم سالاسىندا ساپانى قامتاماسىز ەتۋ كوميتەتىنە «پەداگوگ مارتەبەسى تۋرالى» زاڭ نورمالارىنىڭ ساقتالماۋى تۋرالى 105 ءوتىنىش تۇسكەن بولسا، بيىل 67 ءوتىنىش تىركەلگەن.
مۇعالىمدەردىڭ قۇقىقتارىن بۇزۋ فاكتىلەرى بويىنشا اكىمشىلىك ىستەر دە ازايعان. بىلتىر 56، بيىل 25 اكىمشىلىك ءىس قوزعالدى. ولاردىڭ بارلىعىنا ءتيىستى شارالار قابىلداندى.
ياعني، 2019 جىلى قابىلدانعان زاڭ مۇعالىمدەردى مىندەتىنە جاتپايتىن قىزمەتتەرگە تارتۋعا تىيىم سالىپ، ارتىق ەسەپ بەرۋدى تالاپ ەتۋ جانە مۇعالىمدەردىڭ قۇقىقتارىن بۇزعانى ءۇشىن جاۋاپكەرشىلىكتى قامتاماسىز ەتتى.
«مۇعالىمدەردىڭ قۇقىقتارىن بۇزۋ فاكتىلەرى بارىنشا ازايدى. 2019 جىلعا دەيىنگى جاعداي مەن «پەداگوگ مارتەبەسى تۋرالى» زاڭ قابىلدانعاننان كەيىنگى جاعدايدى سالىستىرۋعا كەلمەيدى. مەكتەپتەر اكىمدىكتەردىڭ قاراماعىندا بولعاندىقتان، مۇعالىمدەر قوعامدىق ورىنداردى تازالاۋعا ءجيى تارتىلاتىن، ولار ءبىرقاتار ءىس-شارادا «ماسسوۆكا» بولاتىن، جوندەۋ جۇمىستارىنا قاتىسىپ، كوپتەگەن گازەتكە جازىلاتىن، ءۇي-ۇيدى ارالاپ، باسقا دا مىندەتىنە جاتپايتىن جۇمىسقا تارتىلاتىن. ەندى مۇنداي جاعدايلار قىسقارىپ، جويىلدى دەۋگە بولادى. بارلىق لاۋازىمدى تۇلعا بىردەن جاۋاپقا تارتىلادى. زاڭ قابىلدانعان العاشقى جىلى مىڭنان استام رەت زاڭ بۇزىلىپ، كوپ باسشىنى جازالاۋعا تۋرا كەلسە، ءقازىر بۇل كورسەتكىش كۇرت ازايدى»، – دەيدى ق ر وقۋ-اعارتۋ مينيسترلىگىنىڭ ءبىلىم سالاسىندا ساپانى قامتاماسىز ەتۋ كوميتەتىنىڭ ءتوراعاسى ەرنۇر داۋەنوۆ.