الماتىدا قازاقستان رەسپۋبليكاسىنىڭ ۇلتتىق عىلىم اكادەمياسىندا ۇوس ارداگەرى زۇلحارناي سەيىتوۆتىڭ اعىلشىنشا شىققان «Biochemister» كىتابىنىڭ تۇساۋكەسەرى ءوتتى. سونداي-اق، ارداگەردىڭ ومىرىنەن حابار بەرەتىن فيلم كورسەتىلدى. فيلم بارىسىندا «الماتى اقشامى» گازەتىندە جاريالانعان ز.سەيىتوۆ تۋرالى ماقالا جايىندا جاقسى ايتىلىپ ءوتتى.
«بيوحيميا» كىتابى ۇلى وتان سوعىسىنىڭ ارداگەرى زۇلحارناي سەيىتوۆتىڭ 100 جىلدىعىنا ارنالدى. تۇساۋكەسەرگە قورعانىس ءمينيسترىنىڭ ورىنباسارى، گەنەرال-لەيتەنانت مۇحامەدجان تالاسوۆ، ق ر قك ارداگەرلەرى، الماتى گارنيزونىنىڭ اسكەري قىزمەتشىلەرى، اكىمدىك وكىلدەرى جانە جوعارى وقۋ ورىندارىنىڭ پروفەسسور-وقىتۋشىلار قۇرامى، سونداي-اق مادەنيەت، قوعام قايراتكەرلەرىمەن بىرگە ب ا ق وكىلدەرى قاتىستى.
«زۇلحارناي سەيىتوۆ 22 جاسقا تولعان شاعىندا سوعىسقا قاتىستى. ەرلىگىن كورسەتتى. بۇدان كەيىن اتامىز عالىم رەتىندە مەديسيناعا ولشەۋسىز ۇلەس قوستى. قانشاما شاكىرت تاربيەلەدى. ماگيسترانتتار مەن دوكتورانتتارعا ارنالعان «بيوحيميا» كىتابىن قازاق، ورىس، اعىلشىن تىلدەرىندە شىعاردى. 1980 جىلى ز.سەيىتوۆ «بيوحيميا» كىتابى ءۇشىن «تارلان – پلاتينا» سىيلىعىنىڭ نوميناسياسىنا يە بولدى. بۇل - كلاسسيكالىق، مەديسينالىق، بيوحيميالىق كىتاپ. وندا امين قىشقىلى، بەلوكتاردان باستاپ زات الماسۋ پروسەسىن، جۇيكە جۇيەسىن، دانەكەر ۇلپاسىن، باۋىر بيوحيمياسىن سيپاتتاپ وتەدى. كىتاپقا بۇگىندە شەتەلدىك عالىمدار دا ءوز قىزىعۋشىلىعىن تانىتۋدا»، – دەيدى بيولوگيا عىلىمىنىڭ دوكتورى، پروفەسسور كامالادين ءشارىپوۆ.
زۇلحارناي سەيىتوۆ سوعىس باستالعان كەزدە لەنينگراد مايدانىنا اتتاندى. ول قورشاۋدا بولدى، شايقاستاردا ستالينگرادتى، بەلارۋسسيانى، پولشانى بوساتتى، بەرليندى الدى. ارداگەر «قىزىل جۇلدىز»، «وتان سوعىسى» وردەندەرىمەن جانە «ەرلىگى ءۇشىن» مەدالىمەن ماراپاتتالدى.
«بۇگىنگى شارا ءبىزدىڭ جاستارىمىزعا ۇلكەن تاعىلىم، تاربيە بەرەرى ءسوزسىز. زۇلحارناي سەيىت ۇلىنىڭ ادال ءىسى قانشاما ۇرپاقتى تاربيەلەپ ءوسىرىپ، بۇگىندە سول شاكىرتتەرى راحاتىن كورىپ وتىر. اتامىز ءتىرى اڭىز ادام. قان مايداندا ەرلىگىمەن دە تانىلعان. فيلمدە دە ايتىلادى عوي، ول كىسى مەنى ساقتاعان ءبىرىنشى قۇداي بولسا، ەكىنشى ءارۋاقتار دەپ. قانشاما جىلداردى ارتقا قالدىرىپ، ەلىمىزگە ەسەلى ەڭبەگىڭىز ءتيدى. باي-قۋاتتى بولىپ الدىمىزدا ماڭگى جۇرە بەرىڭىز. اتامىزدى قورعانىس ءمينيسترىنىڭ اتىنان «ەل قورعانى» توسبەلگىسىمەن ماراپاتتايمىز»، – دەيدى قورعانىس ءمينيسترىنىڭ ورىنباسارى، گەنەرال-لەيتەنانت مۇحامەدجان تالاسوۆ.
ول سوعىستان كەيىن وتانىنا قىزمەت ەتۋدى جالعاستىردى، مەديسينا سالاسىندا ءوز ءىسىنىڭ كورنەكتى مامانى بولدى. ز.سەيىتوۆ - بيولوگيا عىلىمىنىڭ دوكتورى، ونەرتاپقىش، قازاقستاننىڭ ەڭبەك سىڭىرگەن قايراتكەرى. ول - «قازاق بالزامىنىڭ» جانە مەديسينا مەن بيوحيمياداعى باسقا دا جاڭالىقتاردىڭ اۆتورى. بەيبىت ومىردەگى ەڭبەگى ەسكەرىلىپ، «ەرەن ەڭبەگى ءۇشىن» مەدالىمەن ماراپاتتالعان.