ەلىمىزدىڭ مەكتەپتەرىندە 350 مىڭنان استام پەداگوگ ەڭبەك ەتەدى.
ونىڭ ىشىندە 220 مىڭنان استام پەداگوگكە اتتەستاسيا قورىتىندىسى بويىنشا تاعايىندالعان بىلىكتىلىك ساناتى ءۇشىن جالاقىسىنا ۇستەمە اقى تولەنەدى، دەپ حابارلايدى Almaty-akshamy.kz ق ر وقۋ-اعارتۋ مينيسترلىگىنىە سىلتەمە جاساپ.
مىسالى، پەداگوگ-شەبەرگە 50%، پەداگوگ- زەرتتەۋشىگە 40%، پەداگوگ-ساراپشىعا 35%، پەداگوگ-مودەراتورعا 30% ۇستەمە اقى قوسىلادى. ەلىمىز بويىنشا بارلىعى 73 820 پەداگوگ-مودەراتور، 81 168 ساراپشى، 71 141 زەرتتەۋشى، 3482 شەبەر بار.
مەملەكەت باسشىسىنىڭ تاپسىرماسى بويىنشا 4 جىل ىشىندە پەداگوگتەردىڭ جالاقىسى 100%-عا، ياعني، ەكى ەسەگە ارتتىرىلدى. سونداي-اق 2023 جىلدىڭ 1 قىركۇيەگىنەن باستاپ مەكتەپكە دەيىنگى تاربيە مەن ءبىلىم بەرۋ پەداگوگتەرىنىڭ ەڭبەكاقىسى 30%-عا كوبەيتىلدى.
2022 جىلدان باستاپ جالپى ءبىلىم بەرەتىن پاندەر بويىنشا حالىقارالىق وليمپيادالاردىڭ جەڭىمپازدارى مەن جۇلدەگەرلەرىن دايىنداعان مۇعالىمدەرگە كەلەسى مولشەرلەردە ءبىرجولعى سىياقى بەرىلەدى.
1) ءبىرىنشى دارەجەلى ديپلوم جانە التىن مەدال يەگەرىن دايىنداعان پەداگوگكە – بازالىق جالاقىنىڭ 26،5 ەسەلەنگەن مولشەرى؛
2) ءىى دارەجەلى ديپلوم جانە كۇمىس مەدال يەگەرىن دايىنداعان وقىتۋشىعا – بازالىق جالاقىنىڭ 17،5 ەسەلەنگەن مولشەرى؛
3) ءۇشىنشى دارەجەلى ديپلوم جانە قولا مەدال يەگەرىن دايىنداعان وقىتۋشىعا – بازالىق جالاقىنىڭ 8،5 ەسەلەنگەن مولشەرى.
اتاپ وتەيىك،ەلىمىزدە «ۇزدىك پەداگوگ» رەسپۋبليكالىق بايقاۋى وتۋدە. وعان مەنشىك نىسانىنا جانە ۆەدومستۆولىق باعىنىستىلىعىنا قاراماستان مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ ۇيىمدارىنىڭ شتاتتىق پەداگوگيكالىق قىزمەتكەرلەرى قاتىسۋدا.
رەسپۋبليكالىق كەزەڭنىڭ قورىتىندىسى بويىنشا 64 جەڭىمپاز «ۇزدىك پەداگوگ» سەرتيفيكاتىمەن، «ۇزدىك پەداگوگ» توسبەلگىسىمەن جانە 1000 اەك (3 450 000 تەڭگە) كولەمىندە اقشالاي سىيلىقپەن ماراپاتتالادى.