بالالارمەن جۇمىس ىستەي ءبىلۋ وتە ماڭىزدى.
ۇستاز ماماندىعىن تاڭداپ العان جاستار ارنايى ءبىلىم تۋرالى ديپلومى بولعانىمەن، جۇمىسقا بىردەن ورنالاسا المايدى. ولار الدىمەن تاۋەلسىز تەستىلەۋدەن ءوتۋ كەرەك، دەپ حابارلايدى Almaty-akshamy.kz.
ءبىلىم سالاسىنا ەنگىزىلگەن وزگەرتۋلەر تۋرالى قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا جازدى.
«پەداگوگيكالىق باعىتتا ءبىلىم بەرەتىن جوعارى وقۋ ورىندارىنىڭ تۇلەكتەرى ءۇشىن مىندەتتى تەستىلەۋ ەنگىزىلدى. ەندى دايىندىعى ناشار ۇمىتكەرلەر ءمۇعالىم بولىپ جۇمىسقا ورنالاسا المايدى. ياعني پەداگوگيكالىق ءبىلىم تۋرالى ديپلومنىڭ بولۋى ەندى جۇمىسقا بىردەن ورنالاسۋعا كەپىلدىك بەرمەيدى. بالالارمەن جۇمىس ىستەي ءبىلۋ وتە ماڭىزدى جانە جاۋاپتى مىندەت بولعاندىقتان، الدىمەن تاۋەلسىز تەستىلەۋدەن ءوتۋ كەرەك. مۇنداي سىرتقى ەمتيحاندى 2021 جىلى شامامەن 40 مىڭ تۇلەك تاپسىردى. ولاردىڭ ىشىندە شەكتى بالل جيناعاندار عانا مەكتەپتە جۇمىس ىستەۋگە مۇمكىندىك الدى. ەنگىزىلگەن بۇل جاڭاشىلدىق جوعارى وقۋ ورىندارى جۇمىسىنىڭ ساپاسىن دا كورسەتتى. 36 ۋنيۆەرسيتەت وسى ماماندىق بويىنشا دايىنداۋ ليسەنزياسىنان ايىرىلدى»، - دەپ جازدى مينيستر.
سونىمەن قاتار مينيستر پەداگوگتەردى جۇمىسقا قابىلداۋدىڭ جاڭا قاعيدالارى ازىرلەنگەنىن حابارلادى.
«بۇدان بىلاي ديرەكتورلاردىڭ ءوز قالاۋى بويىنشا مۇعالىمدەردى ءوزى جۇمىسقا قابىلداۋعا مۇمكىندىگى بولمايدى. ەندى ناقتى كريتەرييلەر بەلگىلەنىپ، مۇعالىمدەر جۇمىسقا قىزمەتىنىڭ ناتيجەسى مەن جەتىستىكتەرى نەگىزىندە كونكۋرس ارقىلى ورنالاسادى. بيىل بۇل ءراسىم سيفرلىق فورماتقا كوشىرىلەدى»، - دەپ حابارلادى اسحات ايماعامبەتوۆ.