قاستەرلى ماماندىق
ۇلت ۇستازى احمەت بايتۇرسىن ۇلى «ءمۇعالىم - مەكتەپتىڭ جۇرەگى» دەپ باعا بەرىپتى. الاش قايراتكەرىنىڭ بەرگەن باعاسىنان ارتىق باعا بولا قويماس.
بۇگىنگىنىڭ وقۋشىسى بارىنەن زەرەك. بىلاي قاراپ وتىرعاندا تىم كوبىرەك بىلەتىن سياقتى. بۇل تەحنولوگيانى جەتىك يگەرە بىلەتىندىكتەرىنە قاراتا ايتىلعان ءسوز. سول قولىندا سمارتفون، ايفون، ايپاتتى ۇرشىقشا يىرەدى. ال عالامتورداعى ءارتۇرلى ويىن-ساۋىقتىق ۆيدەو مەن قوسىمشالاردى ءۇش جاسار بالا ءوزى قوسىپ، ءوزى اۋىستىرا الاتىن حالدە. ءتىپتى پارادوكس؟!
ءالقيسسا. قازىرگى زامان - اقپاراتتىق تەحنولوگيانىڭ كەزى. مۇندا ءوزىن كورسەتىپ، العا ۇدايى ۇمتىلىپ وتىرعان ابزالىراق. ايتپەسە، اپ-ساتتە شاڭ جۇتىپ قالۋىڭىز عاجاپ ەمەس. سوندىقتان دا، شاكىرت تاربيەلەپ وتىرعان مۇعالىمدەرگە بارىنشا زاماناۋي بولعان ءلازىم. ونسىز نان تاۋىپ، كۇن كورۋ، العا شىعۋ، ءوزىن تانىتۋ، ءارى بارعاندا دالەلدەۋ قيىن سياقتى. ءيا، كوپتىڭ قاتارىندا جۇرە بەرۋگە بولادى. ءبىراق، ودان ەشتەڭە ونبەسىن ۋاقىتتىڭ ءوزى-اق دالەلدەپ تۇر.
زامانا. سوڭعى ۋاقىتتارى مەكتەپ مۇعالىمدەرىنىڭ جالاقىسى ارتتى. ولارعا ماتەريالدىق قولداۋ جاعى كۇشەيىپ جاتىر. مارتەبەسى قالىپقا كەلۋدە. سونىمەن قاتار، جوعارى وقۋ ورنىنىڭ وقىتۋشىلارىنىڭ ايلىعى دا بۇرىنعىدان ەدەۋىر كوبەيدى. وسىنىڭ ءبارى عىلىم مەن ءبىلىم سالاسىندا ءىس اتقارىپ جۇرگەن ازاماتتاردىڭ ابىرويىنىڭ ۇستەمدىگىن كورسەتەدى.
حح عاسىرداعى سۇلتانماحمۇت تورايعىروۆ، احمەت بايتۇرسىن، ماعجان جۇمابايەۆتار بارلىعى عىلىم، ءبىلىم، ونەرمەن شۇعىلدانعان. الاش الىپتارى شاكىرت تاربيەلەپ، بالانىڭ زەيىنىن اشۋدى قولعا العان. ۇلى ىبىراي التىنسارين تورعايدا مەكتەپ اشىپ، «كەل، بالالار، وقىلىق!» دەپ قازاق بالالارىنا ۇندەۋ تاستاعان.
ءتۇيىن. ايتارىمىز - يگى جولعا بەت بۇرعان جاس مۇعالىمدەر تۇتاس ۇلتتى تاربيەلەپ وتىرعاندىعىن ۇمىتپاسا ەكەن!