مالىمدەمەگە قاتىستى سىرتقى ىستەر ءمينيسترى باتمۋنحيين باتسەسەگ تۇسىنىكتەمە بەردى
موڭعوليا مەن اقش بىرلەسكەن بيولوگيالىق زەرتحانا قۇرۋ تۋرالى كەلىسسوز جۇرگىزىپ جاتقان جوق. بۇل تۋرالى موڭعوليا سىرتقى ىستەر ءمينيسترى باتمۋنحيين باتسەسەگ مالىمدەدى، دەپ حابارلايدى Almaty-akshamy.kz Baq.kz-كە سىلتەمە جاساپ.
جاقىندا رەسەيدىڭ كەيبىر جوعارى لاۋازىمدى شەنەۋنىكتەرى «رەسەي ۋكراينادا ارنايى اسكەري وپەراسيا جۇرگىزگەننەن كەيىن امەريكالىق تاراپ موڭعوليامەن بايلانىسقا شىعىپ، بيولوگيالىق زەرتحانا قۇرۋ ماسەلەسىن تالقىلادى» دەپ اقپارات قۇرالدارىندا مالىمدەگەن بولاتىن.
17 ساۋىردە موڭعوليا سىرتقى ىستەر مينيسترلىگى بۇل اقپاراتتىڭ نەگىزسىز جانە شىندىققا جاناسپايتىنىن رەسمي تۇردە مالىمدەدى.
وسى مالىمدەمەگە قاتىستى سىرتقى ىستەر ءمينيسترى باتمۋنحيين باتسەسەگ تۇسىنىكتەمە بەردى.
بۇل اقپارات ءتورت رەت رەسەيلىك گازەتتە جانە ءبىر رەت قىتايدىڭ اقپارات قۇرالدارىندا جاريالاندى. بۇل اقپاراتتىڭ جالعان ەكەنىن مالىمدەگىم كەلەدى. موڭعوليا بەيبىت، اشىق جانە كوپجاقتى قولداۋ كورسەتەتىن سىرتقى ساياساتتى جالعاستىرىپ كەلەدى. قاجەت بولسا، ءبىز ءوز قىزمەتىمىزدى رەسەيلىك جانە حالىقارالىق ۇيىمدارعا، سونداي-اق جۇرتشىلىققا ۇسىنۋعا دايىنبىز. موڭعوليا قوعامدىق ۇيىمدارىنىڭ شەتەلدىك ينۆەستيسيا مەن قارجىلاندىرۋدى تارتۋ ارقىلى جۇزەگە اسىرعان بارلىق جوباسى، باعدارلاماسى مەن زەرتتەۋى تۋرالى تولىق اقپارات بار. اتاپ ايتقاندا، قانداي جوبالار ادامداردى كۇدىكتەندىرەتىنىن مۇقيات تەكسەردىك، - دەدى ول.