رەسپۋبليكادا 63 قۇس فابريكاسى بار
جۇمىرتقا وندىرۋشىلەردى قولداۋ كولەمىن ارتتىرۋ تۋرالى شەشىم قابىلداندى. بۇل تۋرالى تۇركىستان وبلىسىندا وتكەن رەسپۋبليكالىق سەمينار-كەڭەستە اۋىل شارۋاشىلىعى مينيسترلىگىنىڭ باسشىسى ەربول قاراشوكەيەۆ مالىمدەدى، دەپ حابارلايدى Almaty-akshamy.kz Baq.kz-كە سىلتەمە جاساپ.
الەمدىك ازىق-تۇلىك نارىقتارىنداعى تۇراقسىز جاعدايعا بايلانىستى جانە وتاندىق قۇس فابريكالارىن قولداۋ، ىشكى نارىقتىڭ تۇراقتىلىعىن ساقتاۋ ماقساتىندا اۋىل شارۋاشىلىعى مينيسترلىگى جۇمىرتقا وندىرۋشىلەردى قولداۋ كولەمىن ۇلعايتۋ تۋرالى شەشىم قابىلدادى.
اۋىل شارۋاشىلىعى مينيسترلىگى اسىل تۇقىمدى مال شارۋاشىلىعىن دامىتۋدى، مال شارۋاشىلىعىنىڭ ونىمدىلىگىن جانە ءونىم ساپاسىن ارتتىرۋدى سۋبسيديالاۋ قاعيدالارىنا تاعامدىق جۇمىرتقانى سۋبسيديالاۋدى ەنگىزۋ بولىگىندە وزگەرىستەر مەن تولىقتىرۋلار ەنگىزىپ جاتىر.
ەرەجە جوباسىندا جۇمىرتقا ءوندىرىسىنىڭ قۇنىن ارزانداتۋعا ارنالعان سۋبسيديالار ءنورماتيۆىن ەكى ەسە ۇلعايتۋ كوزدەلگەن، ول قۇس فابريكاسىنىڭ قۋاتىنا قاراماستان، ءبىر داناسىنا 3 تەڭگەنى قۇرايدى. وسىلايشا، قولداۋ شاراسىمەن ەلىمىزدىڭ بارلىق جۇمىرتقا قۇس فابريكالارى قامتىلاتىن بولادى، ولاردى سۋبسيديالاۋعا 6،5 ملرد تەڭگە بولىنەدى، - دەلىنگەن اشم باسپا ءسوز قىزمەتىنىڭ حابارلاماسىندا.
رەسپۋبليكادا 63 قۇس فابريكاسى بار، ونىڭ ىشىندە 29 – ەت جانە 34 – جۇمىرتقا باعىتىندا. 2021 جىلدىڭ قورىتىندىسى بويىنشا وتاندىق قۇس فابريكالارى سويىس سالماقتا 266،8 مىڭ توننا قۇس ەتىن ءوندىردى، بۇل جالپى ءوندىرىس كولەمىنىڭ 98 % قۇرايدى. تاۋىق جۇمىرتقاسى 3،5 ملرد دانا نەمەسە جالپى ءوندىرىستىڭ 74% ءوندىرىلدى. قۇس ەتىمەن قامتاماسىز ەتۋ 66%-دى قۇرايدى، يمپورت ۇلەسى 45%-دان 39،5%-عا دەيىن تومەندەدى. ەل تاعامدىق جۇمىرتقامەن 98% قامتاماسىز ەتىلگەن.