ۇكىمەتتە كەڭەس ءوتتى
ۇكىمەتتىڭ سيفرلىق كەڭسەسىندە ق ر پرەمەر-مينيسترى ءاليحان سمايىلوۆ الەۋمەتتىك ماڭىزى بار ازىق-تۇلىك تاۋارلارىنىڭ باعاسىن ۇستاپ تۇرۋ، سونداي-اق «سق-فارماسيا» ج ش س بازاسىندا مەديسينالىق تەحنيكانى ورتالىقتاندىرىلعان ساتىپ الۋعا كوشۋ ماسەلەلەرى جونىندە كەڭەس وتكىزدى، دەپ حابارلايدى Almaty-akshamy.kz ۇكىمەتتىڭ رەسمي سايتىنا سىلتەمە جاساپ.
بايانداما جاساعان ق ر ساۋدا جانە ينتەگراسيا مينيسترلىگىنىڭ ساۋدا كوميتەتىنىڭ ءتوراعاسى ەرجان قازانبايەۆ وتكەن اپتادا الەۋمەتتىك ماڭىزى بار ازىق-تۇلىك تاۋارلارى باعاسىنىڭ ءوسىمى 0،6%-دى قۇراعانىن حابارلادى. اتاپ ايتقاندا، پياز 2،9%، قىرىققابات 2،8%، قۇس ەتى 2،5%، ءسابىز 2،3%، قانت 1،5%-عا قىمباتتادى. وڭىرلەر اراسىندا باعانىڭ ەڭ جوعارى ءوسۋى نۇر-سۇلتان (0،9%) جانە الماتى (0،8%) قالالارىندا تىركەلدى.
ونىڭ ايتۋىنشا، ەلىمىزدە ساۋدا ۇستەمەسىن باقىلاۋ جۇمىستارى اياسىندا ءۇي ماڭىنداعى 32 308 دۇكەن تەكسەرىلدى (قامتۋ – 77%)، سونىڭ ناتيجەسىندە 358 بۇزۋشىلىق انىقتالدى. بارلىق فاكتىلەر بويىنشا ءتيىستى شارالار قابىلداندى. اۋىل شارۋاشىلىعى ءمينيسترى ەربول قاراشوكەيەۆتىڭ ايتۋىنشا، بۇگىنگى تاڭدا قازاقستاندا ازىق-تۇلىكتىڭ (جاڭا ءونىمدى ەسەپتەمەگەندە 669 841 توننا)، ونىڭ ىشىندە سيىر ەتى، كارتوپ، ۇن، جۇمىرتقا، ءسۇت جانە ت. ب. ەداۋىر قورى قالىپتاستىرىلعان.
سونداي-اق ق ر پرەمەر-مينيسترى ءامات باعاسىنىڭ ەڭ جوعارى ءوسىمى تىركەلگەن نۇر-سۇلتان قالاسى اكىمىنىڭ ورىنباسارى ەرلان بەكمۇرزايەۆتىڭ جانە الماتى قالاسى اكىمىنىڭ ورىنباسارى الىشەر ءابدىقادىروۆتىڭ، سونداي-اق رەسپۋبليكا بويىنشا قىرىققاباتتىڭ ەڭ جوعارى باعاسى (كيلوگرامىنا 340 تەڭگە) تىركەلگەن پاۆلودار وبلىسىنىڭ اكىمى ءابىلقايىر سقاقوۆتىڭ ەسەپتەرىن تىڭدادى. كەڭەستى قورىتىندىلاي كەلە، ءاليحان سمايىلوۆ باعانى ۇستاپ تۇرۋ ماسەلەلەرى ءبىرىنشى كەزەكتە ماڭىزدى ەكەنىن اتاپ ءوتتى.
«مەن بىرنەشە رەت "اينالىم سحەماسىن" قارجىلاندىرۋدى ارتتىرۋدى تاپسىردىم، الايدا بۇگىندە جۇمىس ءتيىستى دەڭگەيدە ورىندالمادى. وسى ايدىڭ اياعىنا دەيىن قارجىلاندىرۋدى 100 ملرد تەڭگەگە دەيىن ۇلعايتۋ قاجەت. بۇل كورسەتكىشتى ماقساتتى دەڭگەيگە جەتكىزبەيتىن وڭىرلەردە اكىمدەردىڭ اتالعان سالاعا جەتەكشىلىك ەتەتىن ورىنباسارلارىنا ءتيىستى شارا قولدانۋ تۋرالى ۇسىنىستار قارالاتىن بولادى»، — دەدى ۇكىمەت باسشىسى.
ءاليحان سمايىلوۆ الداعى اگرارلىق ماۋسىم قارساڭىندا وڭىرلەردىڭ باستى مىندەتى كۇزگى اۋىل شارۋاشىلىعى ونىمدەرىن جەتكىزۋگە فورۆاردتىق شارتتار جاساسۋ بولۋى ءتيىس ەكەنىن اتاپ ءوتتى. اۋىل شارۋاشىلىعى مينيسترلىگىنە اكىمدىكتەرمەن بىرگە باعانى ۇستاپ تۇرۋ ماقساتىندا اۋىل شارۋاشىلىعى ونىمدەرىن جەدەل تۇردە تىكەلەي جەتكىزۋ ءۇشىن ءوندىرىس پەن تۇتىنۋ تەڭگەرىمىن تۇراقتى نەگىزدە وزەكتەندىرىپ وتىرۋ تاپسىرىلدى. كۇن تارتىبىندەگى ەكىنشى ماسەلە بويىنشا ءسوز سويلەگەن دەنساۋلىق ساقتاۋ ءمينيسترى اجار عينيات «سق-فارماسيا» ج ش س مەديسينالىق تەحنيكاسىن ورتالىقتاندىرىلعان ساتىپ الۋعا كوشۋ مەملەكەت باسشىسىنىڭ تاپسىرماسىنا سايكەس جۇرگىزىلىپ جاتقانىن ەسكە سالدى. بيىل جوبانى پيلوتتىق رەجيمدە ىسكە اسىرۋ جوسپارلانىپ وتىر، ال 2023 جىلدان باستاپ جابدىقتاردى جەرگىلىكتەندىرۋ نەمەسە كەلىسىمشارتتىق نەگىزدە ءوندىرۋ بويىنشا ۇزاق مەرزىمدى شارتتار جاسالادى. تالقىلاۋ قورىتىندىسى بويىنشا ۇكىمەت باسشىسى بەيىندى مينيسترلىككە اكىمدىكتەر كوتەرگەن ماسەلەلەردى ەسكەرە وتىرىپ، ورتالىقتاندىرىلعان ساتىپ الۋ تەتىكتەرىن پىسىقتاۋدى جانە ۇكىمەتكە ءتيىستى ۇسىنىستار ەنگىزۋدى تاپسىردى.