سوڭعى ۋاقىتتاردا ەلىمىزدە كوللەكسيالىق مونەتالاردىڭ ءجيى شىعاتىنىن بايقاپ ءجۇرمىز. ولار تاريحي-مادەني قۇندىلىعى بار مەرەيتويلىق كۇندەرگە، تاريحي تۇلعالارعا، ماڭىزدى وقيعالارعا شىعارىلادى. الايدا، سانى شەكتەۋلى. سەبەبى، ولار باعالى. ەرەكشە مەتالداردان جاسالادى. ديزاينى دا وزگەشە.
ۇلى اقىن اباي قۇنانبايەۆتىڭ 175 جىلدىعىنا وراي 2020 جىلى قىركۇيەكتە كوللەكسيالىق مونەتا ساتىلىمعا شىعارىلعان. مونەتالاردىڭ سىرت جاعىندا اباي قۇنانبايەۆتىڭ مۇسىندىك پورترەت بەينەسى ءتۇرلى-تۇستى بەينەلەۋ تەحنولوگياسىن قولدانا وتىرىپ ورىندالعان. پورترەتتىڭ وڭ جاعىندا – قازاقتىڭ كيىز ءۇيى دەكورى تۇرىندەگى ويۋ-ورنەك تاسپاسى سالىنعان. نومينالى 500 تەڭگەلىك مونەتا كۇمىستەن سوعىلسا، 100 تەڭگەلىك مەلحيور جانە نەيزيلبەر قوسپاسىنان جاسالعان. اينالىمعا كۇمىستەن جاسالعان نومينالى 500 تەڭگەلىك اقشانىڭ 1500 داناسى دايىندالدى. 100 تەڭگەلىكتەردىڭ مەلحيور قوسپاسىنان 8000 دانا، نەيزيلبەر قوسپاسىنان 7500 دانا شىعارىلعان.
سونداي-اق، اقىن جامبىل جابايەۆتىڭ تۋعانىنا 175 جىل تولۋىنا وراي ۇلتتىق بانك نومينالى 100 تەڭگەلىك JAMBYL. 175 JYL كوللەكسيالىق مونەتاسىن اينالىمعا شىعاردى. مونەتانىڭ ريەۆەرسىندە جامبىل جابايەۆتىڭ پورترەتتىك بەينەسى، ورتالىعىندا «ارتىقشا تۋعان ازامات» ولەڭىنىڭ بىرنەشە جولى ورنالاستىرىلعان. وڭ جاعىندا ويۋ-ورنەك ۇزىندىلەرىنەن جاسالعان دومبىرا كونتۋرىنىڭ ايشىقتى بەينەسى مەن مەرەيتوي داتاسىن بىلدىرەتىن «175 JYL» جازۋى ورنالاسقان. مونەتا 25 مەلحيور قوسپاسىنان، نومينالى 100 تەڭگەلىك، ماسساسى – 15 گرامم، ديامەترى – 33 مم، دايىنداۋ ساپاسى brilliant uncirculated، تارالىمى 15 000 دانا بولىپ دايىندالعان.
بىلتىر ەلىمىزدە تاۋەلسىزدىكتىڭ 30 جىلدىعىنا ارنالعان TÁÝELSIZ QAZAQSTANǴA 30 JYL كوللەكسيالىق نومينالدارى 5000 جانە 500 تەڭگەلىك كۇمىستەن جانە نومينالى 100 تەڭگەلىك مەلحيوردان جاسالعان مونەتالاردى ساتىلىمعا شىعاردى. ديزاينى ءبىرتۋار تاريحي تۇلعالاردىڭ پورترەتتىك بەينەلەرى ورنالاستىرىلعان تاۋەلسىز قازاقستاننىڭ 1993 جىلعى ۇلگىدەگى بانكنوتتارىنىڭ ءبىرىنشى سەرياسىمەن سيمۆولدىق بايلانىسىن كورسەتەدى. كومپوزيسيا ۆيزۋالدى پورترەتتىك قاتاردى اياقتاپ، مەملەكەت تاريحىنداعى مەرەيتويلىق كەزەڭدى لوگيكالىق تۇردە بىلدىرەدى. كۇمىستەن جاسالعان مونەتالار مەملەكەتتىك، ورىس جانە اعىلشىن تىلدەرىندە قۇب- تىڭ نومىرلىك ساپا سەرتيفيكاتتارى بار كادەسىي ورامىندا شىعارىلدى.
2021 جىلدىڭ 30 قاراشاسىنان باستاپ «دالا قازىناسى» سەرياسىمەن شىققان JETI QAZYNA كوللەكسيالىق مونەتالارى ساتىلىمعا شىقتى. التىننان، كۇمىستەن جانە مەلحيوردان دايىندالعان كوللەكسيالىق مونەتالارى بارلىق جەتى دالا قازىناسىنىڭ كوركەم بەينەسىن ءبىر مونەتادا كورسەتەدى. تەحنيكالىق سيپاتتامالارى جاعىنان ولار نومينالى 100 تەڭگەلىك مونەتالارعا ۇقساس. ولاردا «ەر جىگىت»، «سۇلۋ ايەل»، «اقىل- ءبىلىم» «جۇيرىك ات»، «قۇماي تازى»، «قىران بۇركىت»، «بەرەن مىلتىق» بەينەلەنگەن.