YouTube – بۇل قىزمەتتەردى نەمەسە بەلگىلى ءبىر ءونىمدى جىلجىتۋدىڭ ەڭ قولجەتىمدى، تۇسىنىكتى، كەلەشەگى جارقىن جولدارىنىڭ ءبىرى. كوپتەگەن كومپانيالار وسىنى تۇسىنگەندىكتەن، ءوزدەرىنىڭ YouTube ارنالارىن جاسايدى. بجزق دا ءوز سالىمشىلارى، الۋشىلارى جانە قازاقستاندىق جيناقتاۋشى زەينەتاقى جۇيەسىنە قىزىعۋشىلىق تانىتقانداردىڭ بارلىعىنا دا پايدالى ءارى قاجەتتى نارسەنى كوپ ءبىلۋگە بولاتىن، سونىمەن قاتار ولاردىڭ قارجىلىق ساۋاتتىلىعىن ارتتىراتىن زاماناۋي الاڭدى ۇسىنا وتىرىپ، بۇل ۇدەرىستەن شەت قالمادى.
جازىلۋشىلارعا ىڭعايلى بولۋ ءۇشىن بارلىق اقپارات قازاق جانە ورىس ءتىلدەرىندە بەرىلەدى.
بەينەماتەريالدار تاقىرىپتىق ويناتۋ تىزىمدەرىنە بولىنگەن: جىلدار بويىنشا جاڭالىقتار مەن تۇسىنىكتەمەلەر، بجزق-نىڭ بەينەنۇسقاۋلىقتارى، Zeinet. kz/پەنسيا.kz باعدارلامالارىنىڭ شىعارىلىمدارى، «زەينەتاقى جۇيەسى تۋرالى ەكەۋارا اڭگىمە» ايدارى اياسىنداعى سۇحبات.
سونىمەن، بجزق-نىڭ YouTube ارناسى جازىلۋشىلارعا نەنى ۇسىنا الادى؟
مۇندا ءسىز زەينەتاقى قىزمەتتەرىن پايدالانۋ بويىنشا قادامدىق بەينە- نۇسقاۋلىقتاردى تاماشالاپ، مىسالى، مىناداي سۇراقتارعا جاۋاپ الا الاسىز:
– ءوز زەينەتاقى جيناقتارىنىڭ ينۆەستورى بولۋ ءۇشىن نە ىستەۋ كەرەك؟
– زەينەتاقى جيناقتارىن مەرزىمىنەن بۇرىن نەگە جانە قالاي الۋعا بولادى؟
– بولاشاق زەينەتاقىنى قالاي ەسەپتەۋگە بولادى؟
– «جەكە كابينەتتى» قالاي پايدالانۋعا بولادى؟
سونداي-اق، باسقا دا كوپتەگەن بەينە- كەڭەستەر بار. ولاردى زەردەلەي وتىرىپ، ءسىز بجزق-نىڭ سايتىندا نەمەسە ۇيالى قوسىمشاسىنداعى كەز كەلگەن فۋنكسيانى وپ-وڭاي مەڭگەرەسىز.
پايدالى اقپاراتتى جەكە ەپيزودتارعا ءبولىنىپ، جاڭادان تۇسىرىلگەن ەگجەي- تەگجەيلى سيۋجەتتەردەن دە الۋعا بولادى. بۇل پايدالانۋشىعا ءبىر ماتەريالدىڭ ىشىنەن قاجەتتى سۇراعىن نەمەسە تالقىعا سالىنىپ وتىرعان تاقىرىبىن وڭاي تابۋعا مۇمكىندىك بەرەدى.
ارنادان بجزق ماماندارىنىڭ دا، شاقىرىلعان ساراپشىلاردىڭ دا پىكىرلەرىن كورىپ، تىڭداۋعا بولادى. 31-تەلەارنادان كورسەتىلەتىن Zeinet.kz/پەنسيا.kz باعدارلاماسىنىڭ بارلىق شىعارىلىمدارىن دا وسى YouTube ارنامىزدان تابا الاسىز.
قىسقا بەينەماتەريالداردان باسقا، سۇحبات فورماتىندا بەرىلەتىن كۇردەلى ساراپتامالىق باعدارلامالاردى دا بايىپتاپ، باعاسىن بەرىپ وتىرساڭىز بولادى. جۇرگىزۋشىلەر ءوز قوناقتارىنا توسىن دا، وتكىر سۇراقتارىن قويىپ، جاۋاپ رەتىندە سىندارلى كاسىبي پىكىر الادى. بۇل ساراپشىسىماقتاردىڭ قاڭقۋ اڭگىمەلەرى مەن سىلدىر تۇسىنىكتەرىنەن تۇبەگەيلى ەرەكشەلەنەدى.
جالپى، مۇندا كوپتەگەن اقپارات بار جانە اركىم وزىنە قاجەتتى اقپاراتتى تابادى دەپ ۇمىتتەنەمىز. ءبىزدىڭ ارناعا جازىلىڭىز، ىڭعايلى بولۋ ءۇشىن تومەنگى جاعىنداعى QR كودىن قولدانىپ، «لايك» باسىپ، تۇسىنىكتەمە بەرىڭىز، سۇراڭىز! ءبىز ءاردايىم قۋانا جاۋاپ بەرىپ، كومەككە كەلۋگە دايىنبىز!
P.S. بەينەجازبانى كورگەن كەزىڭىزدە، الدىمەن، جاريالاعان كۇنىنە نازار اۋدارىڭىز! ويتكەنى، بجزق اقپاراتتى ۇنەمى جاڭارتىپ وتىرادى. ارناعا وزەكتى نۇسقا عانا جۇكتەلىپ، ەسكى بەينەجازبالار جويىلماي، مۇراعاتتا ساقتالىپ قالادى. سول سەبەپتى، پايدالانۋشى 2015 جىلعى بەينەجازبانى كورىپ، ونىڭ ەسكىرگەن اقپارات ەكەنىن بايقاماي قالۋى ابدەن ىقتيمال.
