Telegram چاتتارىندا اقش-تىڭ فلوريدا شتاتىندا بەزگەكتىڭ ءورشۋى تۋرالى جازىلۋدا. كەيبىر ادامداردىڭ پىكىرىنشە، ونى بيلل گەيتس شىعارعان گەنەتيكالىق تۇرلەندىرىلگەن ماسالاردان تاراعان. بۇل شىندىققا سايكەس كەلمەيدى، دەپ حابارلايدى almaty-akshamy.kz stopfake.kz سىلتەمە جاساپ.
گەنەتيكالىق-موديفيكاسيالانعان ماسالار Oxitec كومپانياسى 2022 جىلى فلوريدا مەن كاليفورنيادا شىعارعان. ولار جابايى ورتاعا Aedes aegypti تۇرىنە جاتاتىن ميلليونداعان اتالىق ماسا، سارى بەزگەكتى ماسا ۇشىرعان. بۇل جاندىكتەردىڭ گەنومى ومىرشەڭ ۇرپاق بەرە المايتىنداي ەتىپ وزگەرتىلگەن. وسىنىڭ ارقاسىندا دەنگە بەزگەگى مەن زيكا ۆيرۋسىن تاراتاتىن Aedes aegypti ماسالارىنىڭ پوپۋلياسياسى بىرنەشە ەسەگە ازايىپ، ادامدارعا ءقاۋىپ توندىرمەيدى.
Aedes aegypti تۇرىنە جاتاتىن ماسالار بەزگەكتىڭ تاسىمالداۋشىسى بولا المايدى. بۇل اۋرۋدى باسقا، Anopheles توبىنا جاتاتىن كىشىگىرىم ماسالار تاراتادى، ادامدارعا اۋرۋدى انالىق ماسالار عانا جۇقتىرادى.
ەستەرىڭىزگە سالا كەتەيىك، Oxitec گەندىك-موديفيكاسيالانعان ماسالاردى باسقا تۇردە عانا ەمەس، باسقا جىنىستا دا شىعارعان.
سونىمەن قاتار بيلل گەيتس Oxitec كومپانياسىنىڭ باسشىسى ەمەس. كومپانيانىڭ باسپا ءسوز حاتشىسى Associated Press پورتالىنا حابارلاعانداي، Aedes aegypti اتالىق ماسالارىن ۇشىرۋ جوباسىنا بيلل گەيتس دەمەۋشىلىك ەتپەگەن جانە وعان مۇلدەم قاتىسى جوق.
قورىتا ايتقاندا، تارالعان اقپارات جالعان. اقش-تا بەزگەكتىڭ ءورشۋى گەنەتيكالىق تۇرلەندىرىلگەن ماسالارمەن، اسىرەسە بيلل گەيتسپەن بايلانىستى ەمەس.