بۇل تۋرالى ق ر ءىىم ەسىرتكى قىلمىسىنا قارسى ءىس-قيمىل دەپارتامەنتىنىڭ ەرەكشە تاپسىرمالار جونىندەگى اعا ينسپەكتورى سەرىك سۇلتانوۆ مالىمدەدى.
ونىڭ ايتۋىنشا، «قاراسورا» ءىس-شاراسى باستالعالى 1300-دەن استام قىلمىس انىقتالدى، 765 ساتۋ فاكتىسى توقتاتىلدى، دەپ حابارلايدى Almaty-akshamy.kz.
«وتكەن اپتادا جامبىل وبلىسىندا ەسىرتكى بويىنشا ءىرى قۇقىقبۇزۋشىلىقتاردىڭ جولى كەسىلدى. بەلباسار اۋىلىندا اۆتوكولىكتى تەكسەرۋ كەزىندە 2 قاپ كەپتىرىلگەن ماريحۋانا تابىلدى. تاركىلەنگەن ەسىرتكىنىڭ جالپى سالماعى 34 كەلىگە جەتتى»، - دەدى ق ر ءىىم ەسىرتكى قىلمىسىنا قارسى ءىس-قيمىل دەپارتامەنتىنىڭ ەرەكشە تاپسىرمالار جونىندەگى اعا ينسپەكتورى سەرىك سۇلتانوۆ اپتالىق بريفينگتە.
زاڭسىز اينالىمنان 8 توننادان استام ەسىرتكى، ونىڭ ىشىندە 168 كەلى سينتەتيكالىق ءتۇر تاركىلەندى. 24 ناركولابوراتوريا تاراتىلدى.
«4 ۇيىمداسقان قىلمىستىق توپتىڭ قىزمەتى توقتاتىلدى، 8 قىلمىستىق ءىس قوزعالدى، ونىڭ ىشىندە ۇيىمداسقان قىلمىستىق توپ ۇيىمداستىرعانى ءۇشىن 6 جانە ترانسۇلتتىق توپتى قۇرعانى ءۇشىن – 2 ءىس بار. 100 كگ-نان استام ەسىرتكى، 84 توننادان استام پرەكۋرسورلار جانە 24 توننا «كوكنار» تاركىلەنگەن 4 كوشباسشى مەن 30-دان استام قىلمىستىق توپ قاتىسۋشىلارى قىلمىستىق جاۋاپقا تارتىلادى»، - دەدى سەرىك سۇلتانوۆ.
ايتا كەتەيىك، جىل سايىن ماۋسىم ايىنان قازانعا دەيىن جابايى قاراسورانىڭ ءوسۋى مەن ءپىسۋى كەزەڭىندە «قاراسورا» جەدەل-پروفيلاكتيكالىق شاراسى وتكىزىلەدى.
وتكەن ايدا پوليسەيلەر 315 قىلمىستى انىقتادى، ونىڭ ىشىندە 121 وتكىزۋ فاكتىسى، ەسىرتكىنى زاڭسىز ساقتاۋدىڭ 49 فاكتىسى، قۇرامىندا ەسىرتكى بار وسىمدىكتەردى ءوسىرۋدىڭ 114 فاكتىسى بار.