پرەزيدەنتتىڭ باسپا ءسوز قىزمەتى مەن KYRAN FILMS بايقاۋ جاريالادى.
باستى ماقسات – تامىرى تەرەڭگە بويلاعان ۇلتتىق سپورت تۇرلەرىن ناسيحاتتاۋ، دەپ حابارلايدى aqshamnews.kz
گران-پري – ءىس-شارا بارىسىندا پرەزيدەنتتىڭ جەكە موبيلوگرافى رەتىندە جۇمىس ىستەۋ.
ەلىمىزدىڭ جاس موبيلوگرافتارىنا تاماشا مۇمكىندىك تۋىپ تۇر. پرەزيدەنتتىڭ باسپا ءسوز قىزمەتى مەن KYRAN FILMS كومپانياسى V دۇنيەجۇزىلىك كوشپەندىلەر ويىندارىنا بايلانىستى ۇزدىك بەينەروليككە بايقاۋ جاريالادى.
جەڭىمپاز مەملەكەت باسشىسىنىڭ ءبىر كۇندىك موبيلوگرافى رەتىندە جۇمىس ىستەۋگە مۇمكىندىك الادى. سونىمەن قاتار پرەزيدەنتتىڭ قولتاڭباسى قويىلعان iPhone 15 Pro Max پەن 1 ميلليون تەڭگە جۇلدەگە يە بولادى. مۇنداعى باستى تالاپ – كوشپەندىلەر ويىندارىنا ارنالعان ەڭ كرەاتيۆتى پرومو-روليك ءتۇسىرىپ، ونى الەۋمەتتىك جەلىلەرگە، WhatsApp، Telegram-عا #nomadgamesfest حەشتەگىمەن جاريالاۋ قاجەت.
V كوشپەندىلەر ويىندارى – الەم نازارىندا. 90-عا جۋىق مەملەكەتتەن 2 مىڭنان اسا سپورتشى قاتىسادى. وسىعان بايلانىستى پرەزيدەنتتىڭ باسپا ءسوز قىزمەتى مەن KYRAN FILMS كومپانياسى ۇزدىك بەينەروليككە بايقاۋ جاريالادى. بۇل جوبا الەمدە العاشقى رەت وتكىزىلىپ وتىر. باستى ماقسات – تامىرى تەرەڭگە بويلاعان ۇلتتىق سپورت تۇرلەرىن ناسيحاتتاۋ.
«بابادان قالعان مول مۇرانى، بۇگىنگە جەتكەن اسىل قازىنانى كوزىمىزدىڭ قاراشىعىنداي ساقتاپ، بولاشاققا ميراس ەتۋ – بۇگىنگى ۇرپاقتىڭ بورىشى. وسى ورايدا پرەزيدەنتتىڭ باسپا ءسوز قىزمەتى مەن KYRAN FILMS كومپانياسى V دۇنيەجۇزىلىك كوشپەندىلەر ويىندارى تۋرالى ۇزدىك بەينەروليك بايقاۋىن ۇيىمداستىرۋدى كوزدەپ وتىر. ماقسات – تامىرى تەرەڭنەن تارتاتىن سپورتتىق ويىنداردى حالىق اراسىندا كەڭىنەن ناسيحاتتاۋ، كوشپەندىلەر ويىندارىنىڭ ءمانى مەن ماڭىزىن ارتتىرۋ، ءدۇبىرلى دودانىڭ جوعارى دەڭگەيدە وتۋىنە اتسالىسۋ»، - دەدى پرەزيدەنت كەڭەسشىسى-باسپاسوز حاتشىسى بەرىك ءۋالي.
گران-پري – ءىس-شارا بارىسىندا پرەزيدەنتتىڭ جەكە موبيلوگرافى رەتىندە جۇمىس ىستەۋ. ءىى ورىنعا – تاعى دا 1 ملن تەڭگە. ءىىى ورىنعا – iPhone 15 Pro Max، IV ورىنعا – 500 000 تەڭگە، 5-15-ورىندارعا – موبيلوگرافقا كەرەكتى جابدىقتار. 16-20 ورىندارعا موبيلوگرافيا كۋرسى سىيلىققا جانە بونۋستىق 50 ورىن ءسىزدىڭ الەۋمەتتىك جەلىدە جيناعان ءاربىر 100 مىڭ قارالىمىڭىز ءۇشىن 50 مىڭ تەڭگە سىيلىققا.
«جالپى 150 كونتەنتمەيكەرگە سىيلىعىمىز بار. پرەزيدەنت اكىمشىلىگى ەلدەگى جاس موبيلوگرافتارعا ەرەكشە مۇمكىندىك بەرىپ وتىر. بايقاۋعا تىگىلگەن جۇلدە قورى دا قوماقتى. باستىسى، قاتىسىپ كورىڭىز، باعىڭىزدى سىناڭىز! قۇرمەتتى قازاقستاننىڭ بارلىق موبيلوگرافى مەن كرەاتيۆتى جاستارى! سىزدەرگە پرەزيدەنتتىڭ جەكە موبيلوگرافى بولۋعا ءبىر كۇندىك ەرەكشە ەكسكليۋزيۆتى مۇمكىندىك تۋىپ تۇر»، - دەپ جازدى موبيلوگراف قىران تالاپبەك.
موبيلوگراف جۇمىسى 1 قىركۇيەككە دەيىن قابىلدانىپ، جەڭىمپازدار 9 قىركۇيەكتە انىقتالادى. ول ءۇشىن كوشپەندىلەر ويىنىنا ارنالعان ەڭ كرەاتيۆتى پرومو-روليك ءتۇسىرىپ، WhatsApp، Telegram-عا #nomadgamesfest حەشتەگىمەن جاريالاساڭىز بولعانى.