ءموبيلدى تولەمدەر تاۋارلار مەن قىزمەتتەرگە اقى تولەۋ ءۇشىن جۇزەگە اسىرىلادى.
ق ر قارجى مينيسترلىگىنىڭ باسپا ءسوز قىزمەتى مالىمدەۋىنشە، ءموبيلدى تولەمدەر تۋرالى سالىق نورماسى 1 ناۋرىزدا كۇشىنە ەنەدى، دەپ حابارلايدى Almaty-akshamy.kz
«جاقىندا «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكسكە (سالىق كودەكسى) تۇزەتۋلەر ەنگىزىلدى. ەنگىزىلگەن وزگەرىستەر سالىقتىق اكىمشىلەندىرۋدىڭ تيىمدىلىگىن ارتتىرۋعا، كولەڭكەلى ەكونوميكانىڭ ۇلەسىن ازايتۋعا جانە ادال بيزنەستى قولداۋعا باعىتتالعان»، - دەپ جازدى مينيسترلىكتىڭ باسپا ءسوز قىزمەتى.
رەسمي ورگاننىڭ مالىمەتى بويىنشا، زاڭدى ازىرلەۋگە «اتامەكەن» ۇلتتىق كاسىپكەرلەر پالاتاسى مەن قازاقستان قارجىگەرلەر قاۋىمداستىعى، ەكىنشى دەڭگەيلى بانكتەر اتسالىسقان.
«بۇل نورمالار كاسىپكەرلىك ماقساتتاعى ءموبيلدى تولەمدەردى جەكە تۇلعالاردىڭ جەكە اۋدارىمدارىنان اجىراتۋعا مۇمكىندىك بەرەدى، قارجى مينيسترلىگى جەكە تۇلعالاردىڭ جەكە اۋدارىمدارىنا سالىق سالىنبايتىنىن ايرىقشا اتاپ وتەدى. زاڭنامادا «ءموبيلدى اۋدارىم» جانە «ءموبيلدى تولەم» ەكى بولەك كورسەتىلگەن. سوڭعىسى تاۋارلار مەن قىزمەتتەرگە اقى تولەۋ ءۇشىن جۇزەگە اسىرىلادى. بۇل سالىق دەكلاراسيالارىندا كاسىپكەرلەردىڭ كىرىستەرىن دۇرىس كورسەتۋگە اكەلەدى»، - دەلىنگەن مامانداردىڭ تۇسىندىرمەسىندە.
مينيسترلىكتىڭ ۇستانىمى بويىنشا، ءموبيلدى تولەمدەردى جەكە تىركەۋ شاراسى ونلاين اۋدارىم جاسايتىن ادامنىڭ بارىنە سالىق جاۋاپكەرشىلىگىن جۇكتەمەيدى. تەك بيزنەستىڭ قولدانىستاعى زاڭنامادا قاراستىرىلعان سالىق مىندەتتەمەلەرىن ورىنداۋىنا باعىتتالعان.
«كاسىپكەرلەر بۇرىنعىداي ءموبيلدى تولەمدى العاننان كەيىن تۇتىنۋشىعا كاسسالىق چەك بەرۋى كەرەك. ءموبيلدى تولەمگە قاتىستى نورمالار 2022 جىلعى 1 ناۋرىزدان باستاپ كۇشىنە ەنەدى. كاسىپكەرلىك قىزمەت بەلگىلەرى بار ۇتقىر تولەمدەر بويىنشا دەرەكتەرمەن الماسۋ تەك 2025 جىلدان باستاپ جوسپارلانادى»، - دەپ جازادى ۆەدومستۆونىڭ باسپا ءسوز قىزمەتى.