كاسىپكەرلەردىڭ تولەم كارتوچكالارىن پايدالانا وتىرىپ تولەمدەردى قابىلداۋدان باس تارتقانى ءۇشىن ءبىرىنشى رەت اكىمشىلىك جاۋاپكەرشىلىككە تارتىلىپ، ەسكەرتۋ جاسالادى، ال قايتالاپ بۇزعان جاعدايدا – 147 680 تەڭگە (40 اەك) كولەمىندە ايىپپۇل سالىنادى (اقبتك-نىڭ 194-بابى).
ءموبيلدى اۋدارىمداردى تەكسەرۋ زاڭسىز كاسىپكەرلىك قىزمەتتى كولەڭكەدەن شىعارۋعا باعىتتالعان، – دەپ حابارلايدى مەملەكەتتىك كىرىستەر كوميتەتى.
كەيبىر كاسىپكەرلەر ساتىلعان تاۋارلار نەمەسە قىزمەتتەر ءۇشىن تولەمدى ءموبيلدى اۋدارىمدار ارقىلى الادى. الايدا، بۇل اۋدارىمدار كاسسالىق اپپاراتتاردى، POS-تەرمينالداردى جانە QR-كودتاردى قولدانباي جۇرگىزىلەدى. تيىسىنشە، چەكتەر بەرىلمەيدى جانە تۇتىنۋشىلاردىڭ قۇقىقتارى بۇزىلادى.
ايتا كەتۋ كەرەك، مەملەكەت بارلىق ءموبيلدى اۋدارىمدى تەكسەرمەيدى.
تەك ءارتۇرلى تۇلعالاردان ءۇش اي قاتارىنان اي سايىن 100 نەمەسە ودان دا كوپ ءموبيلدى اۋدارىم العان تۇلعالار عانا، ياعني، كاسىپكەرلىك قىزمەتتىڭ بەلگىلەرى بايقالعان جاعدايدا تەكسەرۋ جۇرگىزىلەدى.
تۋىستار مەن دوستارعا اقشا اۋدارۋعا بولا ما؟
جەكە تۇلعالار بۇرىنعىداي وزدەرىنىڭ جەكە ماقساتتارى ءۇشىن: تۋىستارىنا، دوستارىنا، اتا-انالارىنا، بالالارىنا جانە باسقا دا ومىرلىك جاعدايلارعا بايلانىستى ءموبيلدى اۋدارىمدار جاساي جانە قابىلداي الادى. بۇعان قاتىستى ەشقانداي شەكتەۋ جوق.
كەيبىر كاسىپكەرلەر قولما-قول اقشاسىز تولەمدەردى قابىلداۋدان باس تارتىپ، تەك قولما-قول اقشامەن تولەم جاساۋدى تالاپ ەتە باستادى، بۇل قانشالىقتى زاڭدى؟
«تولەمدەر جانە تولەم جۇيەلەرى تۋرالى» قازاقستان رەسپۋبليكاسى زاڭىنىڭ نورمالارىنا سايكەس ءتۇرلى تولەم تاسىلدەرى قاراستىرىلعان – بانك كارتاسىمەن، QR تولەمىمەن نەمەسە قولما-قول اقشامەن (25-باپ).
قولما-قول اقشاسىز تولەمدەردى قابىلداۋدان باس تارتۋ زاڭسىز بولىپ تابىلادى جانە تۇتىنۋشىلاردىڭ قۇقىقتارىن بۇزادى.
كاسىپكەرلەردىڭ تولەم كارتوچكالارىن پايدالانا وتىرىپ تولەمدەردى قابىلداۋدان باس تارتقانى ءۇشىن ءبىرىنشى رەت اكىمشىلىك جاۋاپكەرشىلىككە تارتىلىپ، ەسكەرتۋ جاسالادى، ال قايتالاپ بۇزعان جاعدايدا – 147 680 تەڭگە (40 اەك) كولەمىندە ايىپپۇل سالىنادى (اقبتك-نىڭ 194-بابى).
ەگەر كاسىپكەر قولما-قول اقشاسىز تولەم قابىلداۋدان باس تارتسا، قايدا جۇگىنۋگە بولادى؟
قولما-قول اقشاسىز تولەمدەردى قابىلداۋدان باس تارتۋ فاكتىلەرى تۋرالى تۇرعىلىقتى جەرى بويىنشا مەملەكەتتىك كىرىس ورگاندارىنا جۇگىنۋ قاجەت.
ال مىسالى، تاكسي جۇرگىزۋشىلەرى نە ىستەۋى كەرەك؟ ولار كاسسالىق اپپاراتتى وزدەرىمەن بىرگە الىپ جۇرە المايدى عوي.
جەكە تاسىمالداۋشىلار جەكە كاسىپكەر رەتىندە تىركەلۋى كەرەك. مۇنى «e-Salyq Business»، «Egov Mobile» جانە كەيبىر ەكىنشى دەڭگەيدەگى بانكتەردىڭ ءموبيلدى قوسىمشالارى («Halyq bank»، «Kaspi bank»، «BankCenterCredit») ارقىلى جاساۋعا بولادى.
بۇل رەتتە قولما-قول اقشاسىز تولەمدەردى قابىلداۋ ءۇشىن ونلاين رەجيمىندە كاسىپكەرلىك بانك شوتىن اشۋعا بولادى، سول جەرگە كورسەتىلگەن قىزمەتتەر ءۇشىن تولەمدەر تۇسەدى. ول ءۇشىن سىزگە تەك سمارتفون قاجەت. كاسسالىق اپپاراتتار مەن POS-تەرمينالداردى الىپ ءجۇرۋدىڭ قاجەتى جوق.
بۇل باستاما كاسىپكەرلەردىڭ «كولەڭكەگە» كەتۋىنە اكەپ سوقپاي ما؟
قازىرگى تاڭدا سالىقتىق مىندەتتەمەلەردى ادال ورىنداۋ الدەقايدا ءتيىمدى.
بۇگىندە بيزنەس جۇرگىزۋگە جانە ونى دامىتۋعا قولايلى جاعداي جاسالعان. سالىق رەجيمدەرىنىڭ ءتارتىبى جەڭىلدەتىلدى – سالىق مولشەرلەمەلەرى قىزمەت تۇرىنە بايلانىستى تەك 1-4%-دى عانا دەيىن قۇرايدى.
ەگەر مۇنداي جاعدايدا كاسىپكەر ءموبيلدى اۋدارىمدار قابىلداسا، وندا ول ءقازىردىڭ وزىندە «كولەڭكەدە» قالىپ، سالىق باقىلاۋىنا تۇسەدى.
بۇل رەتتە ءموبيلدى اۋدارىمداردى تەكسەرۋ ادال سالىق تولەۋشىلەرگە اسەر ەتپەيدى.
وسىلايشا، ادىلدىك جانە مىندەتتى سالىق سالۋ پرينسيپتەرى جۇزەگە اسىرىلادى. ياعني، بارلىق سالىق تولەۋشىلەر تەڭ بولۋى جانە الىنعان تابىستان سالىق تولەۋى ءتيىس.