تەلەحيكايا «ءمىرجاقىپ. ويان، قازاق!» دەپ اتالادى.
ءمىرجاقىپ دۋلات ۇلى تۋرالى تەلەحيكايانىڭ ءتۇسىرىلىمى باستالدى، دەپ حابارلايدى Almaty-akshamy.kz.
تاريحي تۋىندىدا الاش قايراتكەرىنىڭ ۇلت مۇددەسى جولىنداعى ەرەن ەڭبەگى مەن قيلى تاعدىرى سۋرەتتەلەدى. التى بولىمنەن تۇراتىن سەريالدى بىلتىر «احمەت. ۇلت ۇستازى» حيكاياسىن تۇسىرگەن شىعارماشىلىق توپ قولعا الدى.
تەلەحيكايادا ءمىرجاقىپتىڭ قوعامدىق-ساياسي قىزمەتى، سول داۋىردە باستى ۇرانعا اينالعان «ويان، قازاقتىڭ» شىققان ۋاقىتى كورسەتىلەدى. سونىمەن قاتار، الاشوردا كەزەڭى مەن كەڭەس ۇكىمەتى ورناعاننان كەيىنگى ۇلت زيالىلارىنىڭ قۋدالاۋى سۋرەتتەلەدى. باستى رولدەگى اكتەر - باقىت قاجىبايەۆ.
«ءمىرجاقىپتاي تۇلعانى سومداۋ ءۇشىن ۇلكەن دايىندىق قاجەت ەتەدى. بارىنشا دايىندالۋعا تىرىستىم. ءالى دە كۇمان وتە كوپ. زەرتتەيتىن تۇستارى وتە كوپ. بۇل ەندى سەمكا بارىسىندا رەجيسسەرمەن اقىلداسىپ وتىرىپ، اڭگىمەلەسە كەلە، تاعى دا كوبىرەك دايىندىق بولادى دەگەن ءۇمىت بار»، - دەيدى باستى كەيىپكەر رولىندەگى اكتەر باقىت قاجىبايەۆ.
بۇل سەريال «ۇلت ۇستازى. احمەت» تەلەحيكاياسىنىڭ پاراللەلى ىسپەتتى. بۇل تۋىندىدا دا ءاليحان بوكەيحاننىڭ ءرولىن باۋىرجان قاپتاعاي، احمەت بايتۇرسىنۇلىن بايعالي ەسەنالييەۆ وينايدى. فيلمگە دايىندىق ساۋىردەن باستالدى. دەرەكتەر زەرتتەلدى، ەستەلىكتەر وقىلدى، ماماندار تاريحقا ءۇڭىلدى. بۇل رەتتە، سيرەك قولجازبالار قورىنان 1910 جىلى شىققان «ويان، قازاق» كىتابى الىنعان. ونىڭ كوشىرمەسى جاسالىپ، تەلەحيكايا ارقىلى كورەرمەنگە ۇسىنىلماق.
«ءمىرجاقىپ دۋلات ۇلىنىڭ باسقا الاش قايراتكەرلەرىنەن ەرەكشەلىگى دەسە دە بولادى، ول كىسىنىڭ ءوزىنىڭ تۋعان قىزى گۇلنار دۋلاتوۆا بەرتىنگە دەيىن ءبىزدىڭ ارامىزدا ءومىر ءسۇردى. وتە مول مۇرا قالدىرىپ كەتتى ارتىنا. تەك اكەسى تۋرالى ەمەس، بارلىق الاشورداشىلار جايلى. بىزگە ءبىراز قازىنا بولدى»، - دەيدى «ءمىرجاقىپ. ويان، قازاق!» تەلەحيكاياسىنىڭ رەجيسسەرى مۇرات ەسجان.
تاريحي تۋىندىنىڭ تۇسىرىلىمىنە باس-اياعى 80 اكتەر قاتىسىپ جاتىر. سونداي-اق، 200-دەي ادامنىڭ قاتىسۋىمەن كوپشىلىك ساحنالارى تۇسىرىلەدى. رەجيسسەرلىك توپ ءتۇسىرىلىمدى قازان ايىندا اياقتايدى. ال «ءمىرجاقىپ. ويان، قازاق!» تەلەحيكاياسىن كورەرمەن نازارىنا ۇسىنۋ جەلتوقسانعا جوسپارلانعان.