مينسكىدە ۇجىمدىق قاۋىپسىزدىك تۋرالى شارت ۇيىمىنىڭ سىرتقى ىستەر مينيسترلەرى كەڭەسىنىڭ وتىرىسى ءوتتى، دەپ حابارلايدى almaty-akshamy.kz «حابار 24» سىلتەمە جاساپ.
جيىندا 3 قۇجاتقا قول قويىلدى. بەيبىتشىلىك مەدالىن تاعايىنداۋ، ۇيىمنىڭ قارجىلىق جاعدايىن بەكىتۋ، كۆوتالىق لاۋازىمداردى ءبولۋ تۋرالى شەشىم ماقۇلداندى.
ۇجىمدىق قاۋىپسىزدىك تۋرالى شارت ۇيىمىنا مۇشە ەلدەردىڭ سىرتقى ىستەر مينيسترلەرى حالىقارالىق جانە وڭىرلىك جاعداي بويىنشا پىكىر الماسىپ، ورتاق ماسەلەلەردى تالقىلادى. ۇيىمعا مۇشە مەملەكەتتەر اراسىنداعى سىرتقى بايلانىستى دامىتۋعا قاتىستى جوسپارلارىن ورتاعا سالدى.
كەڭەستە عارىشتاعى قارۋ-جاراق باسەكەلەستىگىنىڭ الدىن الۋ ماسەلەسى تالقىلاندى. ۇجىمدىق قاۋىپسىزدىك كەڭەسىنىڭ كۆوتالىق لاۋازىمداردى ءبولۋ تۋرالى شەشىمى دە ماقۇلداندى. اۋعانستانداعى احۋال دا نازاردان تىس قالمادى.
- بيىل 28-29 ساۋىردە تاجىك-اۋعان شەكاراسىندا ۇقشۇ جۇمىس توبى بولدى. تاجىك تاراپى شەكاراشىلارعا اسكەري تەحنيكانى جەتكىزۋ كولەمىن ۇلعايتۋدى سۇرادى. جۇمىس توبىنىڭ مۇشەلەرى سۇراتىلعان قارۋ-جاراق كولەمىنىڭ كوپ ەكەنىن ەسكەرىپ، باعدارلامانى ودان ءارى پىسىقتاۋدى تاپسىرعان. تاجىك شەكاراشىلارىنىڭ ناقتى قاجەتتىلىكتەرى تۋرالى اقپارات ۇيىمعا مۇشە مەملەكەتتەرگە تالقىلاۋعا بەرىلەدى. سىزدەردىڭ تاراپتان ۇسىنىس كۇتەمىز، - دەدى ۇقشۇ باس حاتشىسى يمانعالي تاسماعامبەتوۆ.