جەلىدە «وتباسى بانك» كليەنتتەرىنىڭ جەكە دەرەكتەرى جاريالاندى جانە بانكتىڭ IT جۇيەسىندە ىركىلىس بولدى دەگەن اقپارات تاراعان ەدى. وسىعان وراي مەكەمەنىڭ باسپا ءسوز قىزمەتى تۇسىنىك بەردى.
«بانكتە كليەنتتەردىڭ جەكە دەرەكتەرىنىڭ ساقتالۋى - العىشارت. ءبىز جەكە دەرەكتەردى جانە اقپاراتتى قورعاۋ سالاسىنداعى زاڭنامانىڭ بۇكىل تالاپتارى مەن نورمالارىن قاتاڭ ساقتايمىز. سايكەسىنشە، وتباسى بانكىندەگى دەرەكتەردىڭ سىرتقا جاريالانىپ كەتكەنى تۋرالى اقپارات شىندىققا جاناسپايدى سونداي-اق، بانكتە IT جوبالار جۇمىسىندا ىركىلىس بولعان جوق. بانك قالىپتى جۇمىس ىستەپ تۇر. قازىرگى ۋاقىتتا «وتباسى بانك» اق 2023 جىلعا دەيىنگى دامۋ ستراتەگياسىن جۇزەگە اسىرىپ جاتىر»، - دەلىنگەن رەسمي تۇسىنىكتەمەدە.
ستراتەگيانىڭ ماقساتى - بانك قىزمەتىندە الدىڭعى قاتارلى تەحنولوگيالاردى ەنگىزۋ جانە اۆتوماتتاندىرۋ ارقىلى كليەنتتەرگە قىزمەت كورسەتۋ وپەراسيالارىن 100% ونلاين رەجيمگە كوشىرۋ.
«كەز كەلگەن تەكسەرۋدىڭ قورىتىندىسى بويىنشا اكت جاسالادى. سونداي-اق، ونى ورىنداۋ بويىنشا ءىس-شارالار جوسپارى قۇرىلىپ، ونى ورىنداۋ بارىسى قاداعالانادى. تەكسەرۋ ناتيجەسى بويىنشا جەكەلەگەن تاپسىرمالاردى ورىنداماعان جاعدايدا قىزمەتتىڭ جەكەلەگەن سالالارىنا جەتەكشىلىك ەتەتىن بانك قىزمەتكەرلەرىنە تارتىپتىك جاۋاپكەرشىلىك قاراستىرىلۋى مۇمكىن»،- دەيدى بانكتەن.
حابارلامادا ايتىلعانداي، تارتىپتىك جاۋاپكەرشىلىككە تارتۋ تۋرالى شەشىمدى بانكتىڭ ديرەكتورلار كەڭەسى قابىلدايدى.
سونداي-اق، اتالعان بانك ءقازىر «اۋديتورلىق باقىلاۋ تۋرالى» زاڭدى ىسكە اسىرۋ بويىنشا ءىس-شارالاردىڭ ورىندالىپ جاتقانىن حابارلاپ وتىر.