قازاقستاندىقتار قۇلدىقتىڭ قانداي تۇرلەرىنە ءجيى ۇشىرايتىنى ايتىلدى
بۇل تۋرالى قازاقستان پرەزيدەنتى جانىنداعى ادام قۇقىقتارى جونىندەگى كوميسسيانىڭ حاتشىسى تاستەمىر ابىشيەۆ ورتالىق كوممۋنيكاسيالار قىزمەتىندەگى دوڭگەلەك ۇستەلدە ايتتى، دەپ حابارلايدى Almaty-akshamy.kz Baq.kz-كە سىلتەمە جاساپ.
«ادام ساۋداسى دەگەن بازارعا بارىپ، ايەلدى، قىزدى نەمەسە ەر بالانى ساتىپ الۋ ەمەس، بۇل قۇلدىقتىڭ زاماناۋي تۇرلەرى. ەڭبەك پەن جۇمىس ارقىلى قاناۋ، سەكسۋالدى قاناۋ، ادامنىڭ دەنە مۇشەلەرى مەن ۇلپالارىن الىپ قويۋ نەمەسە ءبىزدىڭ قىز-كەلىنشەكتەردى ەركىنەن تىس سۋروگاتتى انا رەتىندە پايدالانىپ، بالاسىن الىپ قويۋ نەمەسە ولاردى باسقا ادامعا باقتىرۋ»، - دەدى ول.
تاستەمىر ابىشيەۆ ادام ساۋداسى الەمدەگى زاڭسىز تابىستاردىڭ ىشىندە زاڭسىز قارۋ ساۋدالاۋ مەن ەسىرتكى ساۋداسىنان كەيىنگى ءۇشىنشى ورىندا ەكەنىن اتاپ ءوتتى. وسى ورايدا ادام ساۋداسىنا، ياعني قۇلدىقتىڭ زاماناۋي تۇرلەرىنە قارسى كۇرەس جونىندەگى بولەك زاڭ قازىرگى ۋاقىتتا ازىرلەنىپ جاتقانىن جانە 2023 جىلى قابىلدانادى دەپ ۇمىتتەنەتىنىن ايتتى. بۇل باستامانى «سانا سەزiم» ايەلدەر باستامالارىنىڭ قۇقىقتىق ورتالىعى» قوعامدىق بىرلەستىگىنىڭ ديرەكتورى شاحنوزا حاسانوۆا دا قولدادى.
«جىل سايىن ادام ساۋداسىنىڭ جاڭا نىساندارى دامىپ كەلەدى. ولارمەن كۇرەسۋ جانە الدىن الۋ جۇمىستارىن جۇرگىزۋدى جالعاستىرۋ كەرەك. ءقازىر عالامتوردى ادام ساۋداسى ماقساتىندا قولدانۋ، ونلاين پورنوگرافيا قىزمەتىن كورسەتۋ، ۆەبكام ستۋديالار بەلسەندىگى ارتتى. ۇكىمەت تاراپىنان ەرەكشە نازار اۋدارۋدى تالاپ ەتەتىن ادام ساۋداسىنىڭ قۇرباندارىن قورعاۋ ماسەلەلەرى ءالى دە وزەكتى بولىپ وتىر. وعان ايەلدەر مەن بالالار عانا ەمەس، قۇجاتسىز ازاماتتار، بوسقىندار، ازاماتتىعى جوق تۇلعالار دا جاتادى»، - دەدى ول.