– قازىرگى كريزيس جاعدايىندا تۇرعىندار اسا قاجەتتى تاۋارلاردى الىپ قويعانى دۇرىس. بۇل تۋرالى گەرمانيانىڭ ىشكى ىستەر ءمينيسترى نەنسي فەيزەر جەرگىلىكتى باسىلىمداردىڭ بىرىنە بەرگەن سۇحباتىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى كريزيس كوپ دۇنيەگە مۇقتاج ەكەنىمىزدى انىق كورسەتتى، ياعني ازاماتتىق قورعانىس تۋرالى ايتىپ وتىرمىن. ەگەر ەلەكتر جارىعى ۇزاق ۋاقىتقا سونسە نەمەسە كۇندەلىكتى ومىرىمىزدە باسقا بىردەڭە بولماسا، ۇيدە اسا قاجەتتى ازىق-تۇلىكتەردى الىپ قويعان دۇرىس»، - دەدى نەمىس ءمينيسترى.
گەرمانيانىڭ ءىىم باسشىسى جەرگىلىكتى تۇرعىنداردىڭ نازارىنا توتەنشە جاعدايدا ءبىر ادامعا ون كۇنگە قاجەتتى ازىق-تۇلىك ءتىزىمىن ۇسىندى.
ول ۇسىنعان ون كۇندىك بازالىق تاماق قورى مىناداي: كۇنىنە 2 ليتر كولەمىندە سۇيىقتىق، بارلىعى 20 ليتر؛ جارما، استىق ونىمدەرى، نان، كارتوپ، ماكارون ونىمدەرى، كۇرىش: 3،5 كگ؛ كوكونىستەر، بۇرشاق تۇقىمداستار: 4 كگ؛ جەمىستەر، جاڭعاقتار: 2،5 كگ؛ ءسۇت، ءسۇت ونىمدەرى: 2،6 كگ؛ بالىق، ەت، جۇمىرتقا نەمەسە تۇتاس جۇمىرتقا ۇنتاعى: 1،5 كگ؛ مايلار: 0،375 كگ.
گەرمانيا تۇرعىنى ازىق-تۇلىك قورىن جوسپارلاعاندا جەكە قاجەتتىلىگىن، ديەتالىق تالابى مەن اللەرگياسىن ەسەپكە الۋى ءتيىس.
دارى-دارمەكتەرگە قاتىستى جەكە ءتىزىم بولعانى ءجون، ولاردىڭ اراسىندا اۋىرسىنۋدى باساتىن، سۋىققا قارسى، دەزينفەكسيالىق، ديارەياعا قارسى جانە باسقا دا دارى-دارمەكتەر بولۋى كەرەك.