تۋريزم جانە سپورت ءمينيسترى اۋىر اتلەتيكا فەدەراسياسىنىڭ باسشىلىعى مەن باپكەرلەر قۇرامىمەن كەزدەستى.
جيىندا فەدەراسيا وكىلدەرى سپورتشىلاردىڭ ازيا ويىندارىنداعى ونەرىن قورىتىندىلاپ، اۋىر اتلەتيكا سپورتىن دامىتۋ جوسپارىمەن تانىستىردى، دەپ حابارلايدى Almaty-akshamy.kz.
ق ر تۋريزم جانە سپورت مينيسترلىگىنىڭ مالىمەتىنشە، حانچجوۋداعى ويىنداردا قازاقستان قۇراماسىنىڭ اۋىر اتلەتتەرى نەبارى 1 قولا مەدال ولجالاپ، جارىس الدىندا العان مىندەتتەمەلەرىن ورىنداي المادى. قىتايداعى دوداعا دەيىن ولار 1 كۇمىس جانە 2 قولا مەدال جەڭىپ الۋعا ۋادە بەرگەن ەدى.
ەرمەك مارجىقپايەۆ كەيىنگى جىلدارى اۋىر اتلەتيكا سپورتشىلارىنىڭ جاپپاي دوپينگ داۋىنا ۇشىراپ جاتقانىنا بايلانىستى وتكىر ماسەلە كوتەردى. 2022 جىلدىڭ باسىنان بەرى 43 سپورتشى دوپينگ قولداندى دەپ ايىپتالعان.
ازيا ويىندارى الدىنداعى دوپينگ ماسەلەسىنە بايلانىستى فەدەراسيانىڭ باسشىلىق جانە جاتتىقتىرۋشى قۇرامى تولىق جاڭاردى. ناتيجەسىندە ۇلتتىق قۇراما حانچجوۋدا نەگىزگى قۇرامدا ونەر كورسەتە المادى.
ۇلتتىق دوپينگكە قارسى ورتالىقتىڭ وكىلدەرى سپورتتىق مەديسينا جانە وڭالتۋ ورتالىعىمەن بىرلەسىپ، سپورتشىلاردى جاپپاي شەتتەتۋ سەبەپتەرىن انىقتاۋ ءۇشىن سپورتتىق تاماقتانۋ ۇلگىلەرى مەن فارماكولوگيالىق قۇرالدارعا زەرتتەۋلەر جۇرگىزەدى.
«ەلىمىزدىڭ اۋىر اتلەتيكا سپورتىنىڭ تاريحى باي، جەڭىسپەن ورىلگەن تاماشا ءداستۇرى بار. قالىپتاسقان جاعدايعا بايلانىستى بۇل سپورت تۇرىنەن باس تارتۋعا بولمايدى. جاڭا باسشىلىق پەن جاتتىقتىرۋشىلار شتابى دوپينگ ماسەلەسىنە بايلانىستى دوپينگ سىنامالارىن ەگجەي-تەگجەيلى تەكسەرىپ، تىيىم سالىنعان قۇرالداردى قولدانۋعا نولدىك توزىمدىلىك بويىنشا ءىس-شارالار جوسپارىن ازىرلەۋى كەرەك. سپورتتان شەتتەتىلگەن ساڭلاقتارعا مۇنداي قيىن-قىستاۋ كەزەڭدە قولداۋ كورسەتىپ، ولارعا دەمەۋ بەرۋىمىز كەرەك»، - دەدى تۋريزم جانە سپورت ءمينيسترى.
مينيستر سونداي-اق اۋىر اتلەتيكا فەدەراسياسىنىڭ وكىلدەرىنە ءبىرقاتار تاپسىرما بەردى. اتاپ ايتاقاندا، سپورتشىلاردىڭ سپورتتىق تاماقتانۋ مەن قالپىنا كەلتىرۋ قۇرالدارىن ءوز بەتىنشە ساتىپ الۋىن بولدىرماۋ، بارلىق مۇددەلى مەكەمەلەرمەن بىرلەسىپ فارماكولوگيالىق قۇرالداردى ساتىپ الۋ الگوريتمىن ازىرلەۋ، اۋىر سالماقتاعى سپورتشىلاردى دايارلاۋ جونىندەگى جەكە باعدارلامانى ىسكە قوسۋدى جۇكتەدى.