ەلىمىزدە «جايلى مەكتەپ» پيلوتتىق ۇلتتىق جوباسى ازىرلەنىپ جاتىر

بۇل تۋرالى بۇگىن ۇكىمەت وتىرىسىندا ق ر پرەمەر-مينيسترى ءاليحان سمايىلوۆ ايتتى.

جوبا اياسىندا 840 مىڭ ورىندى قامتيتىن مەكتەپ سالۋ جوسپارلانىپ وتىر، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«ءبىزدىڭ باستى مىندەتىمىز – بالاباقشادان باستاپ، ءبىلىم بەرۋدىڭ بارلىق دەڭگەيلەرىندە حالىقتىڭ ساپالى بىلىمگە قول جەتكىزۋىن قامتاماسىز ەتۋ. بۇل باعىتتا اۋقىمدى جۇمىستار جۇرگىزىلۋدە. 2021ء-شى جىلدان بەرى 674 بالاباقشا اشىلدى. 326 جاڭا مەكتەپ پايدالانۋعا بەرىلدى. سونداي-اق، 1436 مەكتەپ جاڭعىرتىلدى. مەملەكەت باسشىسىنىڭ تاپسىرماسى بويىنشا «جايلى مەكتەپ» پيلوتتىق ۇلتتىق جوباسى ازىرلەنىپ جاتىر. وسى جوبا اياسىندا 2025 جىلعا دەيىن جاڭا قۇرىلىس ستاندارتتارى بويىنشا 840 مىڭ ورىن بەرەتىن مەكتەپ سالۋ كوزدەلگەن»، - دەدى ۇكىمەت باسشىسى.

ونىڭ دەرەگىنشە، جاستاردى كاسىپتىك-تەحنيكالىق بىلىممەن قامتۋ ءۇشىن بيۋدجەتتەن مەملەكەتتىك تاپسىرىس بويىنشا قوسىمشا 45 مىڭ ورىن ءبولىندى. ەڭبەك نارىعىنىڭ سۇرانىسىنا ساي كادر دايارلاۋ ءۇشىن 500-گە جۋىق كاسىپورىن كوللەدجدەردى قامقورلىققا الدى.

«جەتەكشى شەتەلدىك جوعارى وقۋ ورىندارىنىڭ 4 فيليالى اشىلدى. يننوۆاسيالىق باعىتتار بويىنشا شەتەلدەردەن 400 وقىتۋشى تارتىلدى. جالپى، ءبىلىم بەرۋ ساپاسىن جاقسارتۋ بويىنشا جۇيەلى شارالار ىسكە اسىرىلىپ كەلەدى»، - دەدى ءاليحان سمايىلوۆ.