مەدياساۋاتتىلىق ۇعىمىن ۇلعايتقان دۇرىس.
ق ر اقپارات جانە قوعامدىق دامۋ ءمينيسترى دارحان ءقىدىرالى AstanaMediaWeek ءداستۇرلى حالىقارالىق فورۋمىندا قازاقستاندا مەدياساۋاتتىلىقتى ارتتىرۋعا ارنالعان مەكتەپتەر اشىلاتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«فەيكنيۋستى اۋديتوريانى سەنىمدى اقپاراتتى تاني بىلۋگە ماشىقتاندىرۋ ارقىلى عانا ازايتا الامىز دەپ ويلايمىن. وسىنداي كەزدە ويىمىزعا دەزينفورماسيامەن كۇرەسۋدىڭ ءبىر جولى رەتىندە اۋديتوريانى جالعان مەن شىن اقپاراتتىڭ ارا جىگىن اجىراتۋعا ۇيرەتۋ، ياعني مەدياساۋاتتىلىق ۇعىمىن ۇلعايتۋ دۇرىس دەپ سانايمىز. جەكە مەديا، ينفليۋسەر نە رەداكسيالار ءسوز جاۋاپكەرشىلىگىن، اقپاراتتىڭ الدىنداعى، ونىڭ سالدارىنان بولاتىن سالماقتى سەزىنۋى ءتيىس. بۇل ورايدا سالاعا جاۋاپتى مينيسترلىك رەتىندە مەديامەكتەپتەر اشۋ، ونىڭ ىشىندە مەدياساۋاتتىلىق بويىنشا ءبىلىم بەرۋ – ءبىزدىڭ تىكەلەي مىندەتىمىز»، - دەدى دارحان ءقىدىرالى.
ايتۋىنشا، اتالعان باعىتتا بىرلەسىپ قولعا الاتىن ءبىرقاتار ءىس-شارا بار.
«فاكچەكينگ، اقپاراتتى سارالاۋ، ونىڭ شىعۋ توركىنىن تەكسەرۋ، تاراتپاس بۇرىن بەلگىلەنگەن كريتەريلەردەن وتكىزۋ سەكىلدى بىرنەشە ساتىدان تۇراتىن وقىتۋ جۇيەسىن ۇيىمداستىرۋىمىز كەرەك. بۇل ورايدا جۋىردا جاڭارۋى كوزدەلىپ وتىرعان ماسسمەديا تۋرالى زاڭ جوباسىندا ءبىرشاما جاڭاشىلدىق بولماقشى. اقپاراتقا قول جەتكىزۋ، جۋرناليستەردىڭ مارتەبەسىن كوتەرۋ، كاسىبي قۇزىرەتىن ارتتىرۋ سەكىلدى ءبىرشاما وزگەرىستەردى جوسپارلاپ وتىرمىز»، - دەدى مينيستر.