ەلىمىزدىڭ 24 وقۋ ورنىندا جۋرناليستيكا ماماندىعى وقىتىلادى.
بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك Astana Media Week پانەلدىك سەسسياسىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ءوز سوزىندە عىلىم ءمينيسترى بۇل جيىنعا ۇلكەن ۇندەۋمەن، كومەك سۇراپ كەلىپ وتىرعانىن ايتتى.
«ءبىزدىڭ مينيسترلىكتىڭ قۇرىلۋىنىڭ نەگىزگى سەبەبى دە، ماقساتى دا – جوعارى ءبىلىم مەن جالپى كادر دايارلاۋ مودەلىن وزگەرتۋ. وزدەرىڭىزگە ءمالىم، مەن سوڭعى 4-5 جىلدا جاڭا ماماندىقتار، جالپى، كادر دايارلاۋ، اسىرەسە، جوعارى ءبىلىم بەرۋ سالاسىنىڭ ەڭبەك نارىعىمەن ۇيلەسپەۋى ماسەلەلەرىمەن اينالىسىپ ءجۇرمىن. سوندىقتان مينيسترلىكتىڭ قازىرگى ستراتەگياسى، باسىم باعىتى – وسى. ءبىزدىڭ مينيسترلىك ەندى ءار سالانىڭ، ءار ءوڭىردىڭ تالاپتارىن، كادرلىق تاپشىلىقتارىن، جاڭا ماماندىقتارىن ايقىنداپ، وقۋ باعدارلامالارىن سول تالاپتارعا، سول سۇرانىسقا ۇيلەستىرىپ اتقارۋى كەرەك. ءقازىر ەلىمىزدىڭ 24 جوو-دا جۋرناليستيكا جانە مەديا ماماندارى دايارلانىپ جاتىر. ءدال ءقازىر 4588 ستۋدەنت وقىپ جاتىر، ونىڭ ىشىندە مەملەكەتتىك تاپسىرىسپەن 1323 ادام ءبىلىم الۋدا. بيىل 272 تۇلەك وقۋىن اياقتايدى»، - دەدى ساياسات نۇربەك.
ءمينيستردىڭ ايتۋىنشا، ەڭ نەگىزگى ماسەلە – مامانداندىرىلعان جۋرناليستيكالىق باعدارلامالاردىڭ از بولۋى.
«وسى ماسەلە جىلدان-جىلعا كوتەرىلىپ كەلەدى. جوو-لار دا اقىرىنداپ ارەكەت ەتۋدى باستادى. مىسالى، بىلتىر ەۋرازيا ۇلتتىق ۋنيۆەرسيتەتىندە جۋرناليستيكا جانە ساياساتتانۋ جانە الەۋمەتتانۋ فاكۋلتەتتەرى بىرىگىپ، «سپورت جۋرناليستيكاسى» ماماندىعىن اشتى. وعان قوسا، "سيفرلىق مەديانى باسقارۋ" ماماندىعى اشىلدى. Astana IT ۋنيۆەرسيتەتى بىلتىر «سيفرلىق جۋرناليستيكا» ماماندىعىن اشىپ، ءقازىر «Big data جۋرناليستيكا» ماماندىقتارىن پىسىقتاپ جاتىر. جالپى، 24 وقۋ ورنىنىڭ باسىم كوپشىلىگى – مەملەكەتتىك ۋنيۆەرسيتەتتەر، ءوزىمىزدىڭ وڭىرلىك وقۋ ورىندارى. ەندى وقۋ-ادىستەمەلىك بىرلەستىكتەردىڭ جۇمىستارىن پىسىقتاۋدا سول وڭىردەگى ەرەكشەلىكتەردى ەسكەرە وتىرىپ، جۋرناليستيكا باعدارلامالارىن پىسىقتاساق. مىسالى، قوستاناي وڭىرىندە اگروجۋرناليستيكا، اۋىل شارۋاشىلىعىنا ماماندانعان جۋرناليستەر قاجەت»، - دەدى س. نۇربەك.
سونىمەن بىرگە، مەملەكەتتىك ستاندارتتى وزگەرتكەندە، ءبىرىنشى كەزەكتە ديسسەرتاسيالار مەن ديپلومدىق جۇمىستاردىڭ عىلىمي جەتەكشىلىگىن تەك قانا عىلىمي دارەجەسى بارلار عانا ەمەس، يندۋسترياداعى مىقتى ماماندار دا جۇرگىزە الادى.
«ساباق بەرۋدى دە تەك قانا دوكتورلار مەن PhD يەگەرلەرى ەمەس، سول يندۋستريانىڭ ىشىنەن شىققان تاجىريبەسى بار ادامدارعا رۇقسات ەتەمىز. «Endowed professor» ۇعىمى شەتەل تاجىريبەسىندە بار. تاعى ءبىر ماڭىزدى نارسە – وقىتۋشىلارعا بايلانىستى. ءيا، «عىلىمي جۋرناليستيكا»، «Big data» دەپ جاڭا وقۋ باعدارلاماسىن جاساي الامىز. ءبىراق وقىتۋشى تابىلمايدى. سول بۇرىنعى وقىتۋشىلار ساباقتىڭ اتىن وزگەرتكەنىمەن، مازمۇنىن باياعىداي قالدىرادى. ءبىزدىڭ جانايقايىمىز، ۇندەۋىمىز وسى، سالا ماماندارىنان جوو-عا كومەك قاجەت»، - دەدى ساياسات نۇربەك.
ايتا كەتەيىك، Astana Media Week 26-28 قازان كۇندەرى وتەدى. وندا 150 وتاندىق جانە حالىقارالىق سپيكەردىڭ قاتىسۋىمەن 30-دان استام ءىس-شارا وتەدى. جىلدىڭ باستى تاقىرىبى - «جاڭا ءداۋىر – جاڭا مەديا». تاقىرىپ جوبانىڭ ءۇش قۇندىلىعىن اشۋى ءتيىس: جاڭا داۋىردەگى سەنىم، جاڭا ۋاقىتتاعى كاسىبيلىك جانە باق-تىڭ ۇزدىكسىز دامۋى.
ءبىرىنشى كۇنى AMW قاتىسۋشىلارى پانەلدىك سەسسيا اياسىندا ءازىربايجان، وزبەكستان جانە قىرعىزستان سياقتى ورتالىق ازيا بۇقارالىق اقپارات قۇرالدارىنىڭ وكىلدەرىمەن ورتاق سىن-قاتەرلەرگە ورتاق جاۋاپتاردى قالاي تابۋعا بولاتىنىن تالقىلايدى.
سونىمەن قاتار، بۇگىن Astana Media Week اياسىندا Nickelodeon تەلەارناسى مەن Turanews.kz جاڭا اقپارات پورتالىنىڭ تۇساۋكەسەرى وتەدى.
Astana Media Week ءداستۇرلى تۇردە باسپا ءسوز، راديو، ينتەرنەت-جۋرناليستيكا سالاسىنداعى ۇزدىك جەتىستىكتەرى ءۇشىن «ۇركەر» سىيلىعىن تاپسىرۋدىڭ سالتاناتتى راسىمىمەن اياقتالادى.