ۇن شىعارۋ كۆوتاسى ەنگىزىلگەن
اۋىل شارۋاشىلىعى ءمينيسترى ەربول قاراشوكەيەۆ استىق پەن ۇن ەكسپورتىنا ەنگىزىلگەن شەكتەۋلەردى الىپ تاستاۋدى ۇسىندى، دەپ حابارلايدى Almaty-akshamy.kz.
«قىركۇيەكتە قازاقستاندىق استىق پەن ۇنعا شەتەلدىك نارىقتار قايتادان اشىلۋى مۇمكىن. ولاي دەيتىنىم، ءقازىر اۋىل شارۋاشىلىعى مينيسترلىگى سىرتقى ساۋدا ساياساتى ماسەلەلەرى جونىندەگى ۆەدومستۆوارالىق كوميسسياعا بيداي مەن ۇندى شىعارۋعا ەنگىزىلگەن شەكتەۋ شارالارىن الىپ تاستاۋ مۇمكىندىگىن قاراستىرۋدى ۇسىنىپ وتىر. ءبىزدىڭ بۇل باستامامىز كەلەسى اپتانىڭ باسىندا كوميسسيا وتىرىسىندا تالقىلانادى»، - دەپ جازدى مينيستر Facebook پاراقشاسىندا.
ەربول قاراشوكەيەۆ مينيسترلىكتىڭ بۇل شەشىمى نەمەن بايلانىستى ەكەنىن ءتۇسىندىرىپ ءوتتى.
ونىڭ ايتۋىنشا، قازاقستاندا 30 قىركۇيەككە دەيىن 550 مىڭ توننا استىق جانە 370 مىڭ توننادان اسپايتىن ۇن شىعارۋ كۆوتاسى ەنگىزىلگەن.
«بۇل شەكتەۋلەر ەنگىزىلگەن كەزدە ءبىز، ەڭ الدىمەن، كۇردەلى حالىقارالىق جاعدايدى ەسكەرە وتىرىپ، ىشكى نارىقتا ازىق-تۇلىك داعدارىسىن بولدىرماي، ساقتاۋعا تىرىستىق. ونىڭ ۇستىنە، سول كەزدە قازاقستاندا ءونىمنىڭ قانداي بولاتىنىن بولجاپ ءبىلۋ مۇمكىن بولمادى. ءقازىر جاعداي وزگەردى. بۇگىنگى بيدايدىڭ جالپى ءتۇسىمىنىڭ وپتيميستىك بولجامى شامامەن 13 ملن توننا كولەمىندە بولادى دەپ وتىر. بۇل - وتكەن جىلدىڭ كورسەتكىشىنەن ەداۋىر كوپ. سوندىقتان ءبىز اۋىل شارۋاشىلىعى تاۋارىن وندىرۋشىلەرگە استىق پەن ۇندى شەتەلگە شىعارۋعا رۇقسات بەرۋدى ورىندى دەپ سانايمىز. سەبەبى بىلتىرعى قالدىقتاردى قوسا ەسەپتەگەندە، بيىلعى ءونىم قازاقستاندىق جانە ەكسپورتتىق نارىققا دا جەتەدى. سوندىقتان، الداعى وتەتىن جيىندا ءبىزدىڭ بۇل ۇسىنىسىمىز قولداۋ تاۋىپ، قىركۇيەك ايىندا بارلىق ەكسپورتتىق شەكتەۋلەر الىنادى دەپ ۇمىتتەنەمىز»، - دەپ تۇيىندەدى ءسوزىن مينيستر.