يادرولىق مەديسينا
بۇگىن استانادا ق ر دەنساۋلىق ساقتاۋ ءمينيسترى اجار عينيات شەتەلدىك ارىپتەستەرمەن ءوزارا ىنتىماقتاستىقتى تەرەڭدەتۋ ماسەلەلەرى بويىنشا ءبىرقاتار كەزدەسۋلەر وتكىزدى، دەپ حابارلايدى Almaty-akshamy.kz.
اتوم ەنەرگياسى جونىندەگى حالىقارالىق اگەنتتىكتىڭ (ماگاتە) باس ديرەكتورى رافاەل ماريانو گروسسي مىرزامەن اڭگىمەلەسۋ بارىسىندا مينيستر ءوزارا سەنىمگە نەگىزدەلگەن ماگاتە-مەن دەنساۋلىق ساقتاۋ سالاسىنداعى ەكىجاقتى ىنتىماقتاستىقتىڭ ماڭىزدىلىعىن اتاپ ءوتتى.
كەلىسسوزدەر بارىسىندا تاراپتار ZODIAC (زوونوزدىق اۋرۋلار) باعدارلاماسى، "Rays of hope" (ءۇمىت ساۋلەلەرى) باعدارلاماسى شەڭبەرىندەگى ىنتىماقتاستىقتى كەڭەيتۋ مۇمكىندىكتەرىن قوسا العاندا، قازاقستان مەن ماگاتە ىنتىماقتاستىعىنىڭ نەگىزگى ۆەكتورلارىن جانە باسقا دا باعىتتاردى تالقىلادى.
دەنساۋلىق ساقتاۋ مينيسترلىگىنىڭ باسشىسى بۇعان دەيىن ماگاتە-مەن ارىپتەستىكتى كەڭەيتۋ مۇمكىندىكتەرى قاراستىرىلعانىن جانە ZODIAC باعدارلاماسىن ىسكە اسىرۋ ماقساتىندا ىنتىماقتاستىقتى جانداندىرۋ قاجەت ءتورت نەگىزگى باعىت ايقىندالعانىن ەسكە سالدى. بۇل بىرلەسكەن عىلىمي زەرتتەۋلەر جۇرگىزۋ، كادرلار دايارلاۋ، بيوقاۋىپسىزدىك سالاسىندا اقپارات الماسۋ، جابدىقتار مەن رەاكتيۆتەردى ساتىپ الۋ بولدى.
اجار عينيات ماگاتە-دەگى ارىپتەستەرىن يادرولىق مەديسينا تەحنولوگيالارىن پايدالانا وتىرىپ، قاتەرلى ىسىكتەردى دياگنوستيكالاۋ مەن ەمدەۋدىڭ جاڭا ادىستەرىن ازىرلەۋ جانە كلينيكالىق پراكتيكاعا ەنگىزۋ بولىگىندە بىرلەسكەن ىنتىماقتاستىق ماسەلەسىن قاراۋعا شاقىردى.
يادرولىق مەديسينا راديواكتيۆتى يزوتوپتاردى قولدانۋ ارقىلى دياگنوستيكا مەن ەمدەۋدىڭ زاماناۋي باعىتتارىنىڭ ءبىرى بولىپ تابىلاتىنى بەلگىلى.
بۇگىنگى تاڭدا ق ر اۋماعىندا 10 پەت/كت اپپاراتى بار 7 يادرولىق مەديسينا ورتالىعى جۇمىس ىستەيدى. ەكى جىل بۇرىن قازاقستاندا سەمەي قالاسىندا العاشقى يادرولىق مەديسينا جانە ونكولوگيا ورتالىعى اشىلدى. بۇل ورتالىقتىڭ جۇمىس قاعيداتى ءارتۇرلى اۋرۋلاردى دياگنوستيكالاۋ جانە ەمدەۋ ءۇشىن راديوفارماسيەۆتيكالىق پرەپاراتتاردى قولدانۋ بولىپ تابىلادى. سونىمەن قاتار، اتالعان ورتالىقتىڭ نەگىزىندە سيكلوترون ىسكە قوسىلدى، ول قىسقا ءومىر سۇرەتىن راديوفارماسيەۆتيكالىق پرەپاراتتاردىڭ جەكە ءوندىرىسىن جانە پەت/كت زەرتتەۋلەرىن جۇرگىزۋگە مۇمكىندىك بەرەدى.
ءارى قاراي ا. عينيات دەنساۋلىق ساقتاۋ سالاسىنداعى ينۆەستيسيالىق جوبالاردى تالقىلاۋ ماقساتىندا "MEDEF International" فرانسۋز بيزنەس-دەلەگاسياسىنىڭ وكىلدەرىمەن كەلىسسوزدەر جۇرگىزدى.