جەر داۋى
ارمەنيا مەن ءازىربايجان ءبىر-بىرىنىڭ اۋماقتىق تۇتاستىعىن مويىنداعان جاعدايدا بەيبىت كەلىسىمگە كەلۋى مۇمكىن. ارمەنيا ءازىربايجاننىڭ اۋماقتىق تۇتاستىعىن تولىق مويىندايدى جانە كسرو كەزىندەگى كارتانى نەگىزگە الۋدى ۇسىنادى. بۇل تۋرالى پارلامەنتتە ارمەنيا پرەمەر-مينيسترى نيكول پاشينيان مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ەگەر ەكى ەل ەكىۇشتى جانە قۇيتىرقى ويسىز ءبىر-بىرىنىڭ اۋماقتىق تۇتاستىعىن مويىنداپ، بۇگىن دە، كەيىن دە اۋماققا قاتىستى نارازى بولمايتىنىنا مىندەتتەلسە ارمەنيا مەن ءازىربايجان بەيبىت كەلىسىمگە قول جەتكىزۋى مۇمكىن. ءقازىر مەن ارمەنيا رەسپۋبليكاسى ءازىربايجاننىڭ اۋماقتىق تۇتاستىعىن تولىق مويىندايتىنىن راستاعىم كەلەدى جانە ءازىربايجان دا ارميان كسر اۋماعىن ارمەنيا رەسپۋبليكاسىنا تيەسىلى دەپ مويىنداعانىن كۇتەمىز»، - دەپ مالىمدەدى نيكول پاشينيان 2022 جىلعى ەل ۇكىمەتىنىڭ ەسەبىن ۇسىنا وتىرىپ.
ونىڭ سوزىنشە، فاكت جۇزىندە تاراپتار بۇل تۋرالى 2022 جىلدىڭ 6 قازانىندا پراگادا جانە 2022 جىلدىڭ 31 قازانىندا سوچيدە كەلىسىپ، كەلىسىم جاريا مالىمدەمەدە تىركەلگەن بولاتىن.
«سوعان قاراماستان، ەريەۆاننان دا، باكۋدەن دە قارسى تاراپتى كەلىسىمدى ورىندامادى دەپ ايىپتايتىن رەسمي مالىمدەمە جاسالدى. سونداي-اق ارمەنيا بەيبىت كەلىسىم كەزىندە ءازىربايجاننىڭ اۋماقتىق تۇتاستىعىن مويىنداۋدان باس تارتتى نەمەسە باس تارتادى دەگەن پىكىرلەر – جالعان، ءبىز ونى دالەلدەي الامىز. ءبىز ءوزىمىز بەيبىتشىلىك تۋرالى كەلىسىمگە ەكى ەلدىڭ اۋماقتىق تۇتاستىعىن مويىنداۋ نەگىزى رەتىندە كسرو دايىنداپ، بەكىتكەن ارميان مەن ءازىربايجان كسر كارتاسىن ەنگىزۋدى ۇسىنعانبىز»، - دەپ اتاپ ءوتتى نيكول پاشينيان.