الماتىدا 50ء-شى جىلداردان باستاپ پايدالانىلاتىن سۋ قۇبىرى جەلىلەرىن قايتا جاڭارتۋ جۇمىستارى اياقتالىپ كەلەدى
الماتى اكىمى ەربولات دوسايەۆ بوستاندىق اۋدانى ماركوۆ كوشەسىندەگى ءال-فارابي داڭعىلىنان عابدۋللين كوشەسىنە دەيىنگى سۋ قۇبىرى جەلىلەرىن قايتا جاڭارتۋ بارىسىمەن تانىستى، دەپ حابارلايدى اlmaty-akshamy.kz.
بۇل ۋچاسكەدەگى قۇبىر 50ء-شى جىلداردىڭ سوڭىندا پايدالانۋعا بەرىلدى. جەلىلەر 100% توزعان، تەك سوڭعى ەكى جىلدا ۋچاسكەدە 20 اپاتتىق جاعداي ورىن الدى.
1،2 كم سۋ قۇبىرى جەلىلەرىن رەكونسترۋكسيالاۋ جۇمىستارى 2023 جىلدىڭ تامىزىندا باستالىپ، سول جىلدىڭ سوڭىنا دەيىن اياقتالۋى كەرەك ەدى. الايدا مەردىگەر ۇيىم مەرزىمىندە اياقتامادى، وسىعان بايلانىستى كومپانيانى مەملەكەتتىك ساتىپ الۋدىڭ جاۋاپسىز قاتىسۋشىسى دەپ تانۋ تۋرالى سوتقا تالاپ ارىز بەرىلدى. ءىس قارالىپ جاتىر.
قۇرىلىس-مونتاج جۇمىستارى 2024 جىلدىڭ ناۋرىزىندا قايتا جانداندى، 2024 جىلدىڭ ماۋسىمىنا اياقتالادى دەپ جوسپارلانعان.
قالا باسشىسى مەردىگەرگە مەرزىمدى بۇزعانى جانە مىندەتىنە سالعىرت قاراعانى ءۇشىن سوگىس جاريالاپ، «ەندى جاۋاپسىز مەردىگەرلەرمەن جۇمىس ىستەمەيمىز» دەپ ەسكەرتتى.
ەربولات دوسايەۆ جاۋاپتى تۇلعالارعا مەردىگەردىڭ مىندەتتەمەلەردىڭ ساپالى ءارى ۋاقىتىلى ورىندالۋىن قاتاڭ باقىلاۋدى قامتاماسىز ەتۋدى تاپسىردى.
سونداي-اق، مەگاپوليس باسشىسى قۇرىلىس جۇرگىزۋ كەزىندە ءتارتىپ ساقتاماعانى ءۇشىن ەسكەرتۋ جاسادى.
وسى ۋچاسكەدەگى سۋ قۇبىرى جەلىلەرىن قايتا جاڭارتۋ 43 كوپپاتەرلى ءۇي مەن 6 اكىمشىلىك عيماراتتى سۋمەن قامتاماسىز ەتەدى.
جۇمىس بارىسىندا تۇتىنۋشىلاردىڭ سۋمەن جابدىقتالۋى توقتاتىلعان جوق. جول توسەمى قازىرگى شارت اياسىندا قالپىنا كەلتىرىلەدى. سۋ قۇبىرى جەلىسىن قايتا جاڭارتۋ «الماتى سۋ» مكك مەنشىكتى ينۆەستيسيالىق باعدارلاماسى شەڭبەرىندە جۇرگىزىلدى.