الماتى قالاسىندا الاكول كولى باعىتىنداعى جازعى تاسىمالداردى ۇيىمداستىرۋ بويىنشا قتج جانە «جولاۋشىلار تاسىمالى» اق باسشىلىعى، تۋريستىك وپەراتورلار جانە دەمالىس بازالارىنىڭ يەلەرىنىڭ قاتىسۋىمەن كەڭەيتىلگەن كەڭەس ءوتتى. سونداي-اق، وتىرىسقا «اتامەكەن» ۇكپ، كولىك مينيسترلىگى تەمىرجول جانە سۋ كولىگى كوميتەتىنىڭ، سالالىق قاۋىمداستىقتاردىڭ وكىلدەرى شاقىرىلدى، دەپ حابارلايدى اlmaty-akshamy.kz.
2024 جىلدىڭ جاز ايلارىندا قتج وتكەن جىلدىڭ سايكەس كەزەڭىمەن سالىستىرعاندا كۋرورتتىق ايماقتارعا جولاۋشىلار تاسىمالىن ۇلعايتۋدى جانە 4،2 ملن-نان استام جولاۋشىنى تاسىمالداۋدى جوسپارلاپ وتىر.
الاكول كولىنىڭ باعىتىندا پويىزدار استانا، الماتى، شىعىس قازاقستان جانە اباي وبلىستارىنان 12 باعىت بويىنشا قاتىنايتىن بولادى. سونداي-اق، بيىل العاش رەت بۇل باعىتتا قىزىلوردادان پويىز جۇرەدى. ون باعىت بويىنشا «جولاۋشىلار تاسىمالى» اق پويىزدارى، ال ەكى باعىت بويىنشا - جەكە تاسىمالداۋشىلار قۇرامى جۇرەتىن بولادى. ۇلتتىق تاسىمالداۋشىنىڭ پويىزدارىنىڭ قۇرامى تولىعىمەن اۋانى باپتاۋ جۇيەسىمەن جابدىقتالعان ۆاگونداردان قۇرالادى.
«تەمىرجول كولىگى ەلىمىزدىڭ تۋريزم سالاسىن دامىتۋدا شەشۋشى ءرول اتقارادى. ءبىز جىل سايىن الاكول كۋرورتتىق ايماعىنا جولاۋشىلاردىڭ تاسىمالداۋعا دەگەن سۇرانىسى ارتقانىن بايقايمىز. سوندىقتان وسى جازعى ماۋسىمعا الاكول كولىنە دەيىنگى پويىزدارداعى ورىنداردىڭ سانىن ارتتىرۋ ماقساتىندا، وتكەن جىلمەن سالىستىرعاندا 16 مىڭعا، ياعني 270 مىڭ ورىنعا دەيىن ۇلعايتۋ تۋرالى شەشىم قابىلدادىق»، - دەپ اتاپ ءوتتى، «جولاۋشىلار تاسىمالى» اق باسقارما ءتوراعاسى جانىبەك تايجانوۆ.
الاكول باعىتىنداعى پويىزدار تۋريستەر ءۇشىن تانىمال جالاڭاشكول، اقشي جانە بەسكول ستانسيالارىندا توقتايدى. وندا جولاۋشىلاردىڭ جايلىلىعى مەن قاۋىپسىزدىگىن قامتاماسىز ەتۋ ءۇشىن قاجەتتى جاعدايلار جاسالعان: پەرروندار ۇلعايتىلدى، كۇتۋ زالدارى مەن كاسسالار جوندەلدى. جولاۋشىلارعا ىڭعايلى بولۋ ءۇشىن ستانسيالاردا كاسسيرلەردىڭ اۋىسىمدىق جۇمىسى ۇيىمداستىرىلدى. سونداي-اق، بيلەتتەردى bilet.railways.kz سايتتىندا كوميسسياسىز ساتىپ الۋعا بولادى. ال بيلەتتەر بولماعان جاعدايدا جولاۋشى «كۇتۋ پاراعى» قىزمەتىن پايدالانا وتىرىپ، پويىزدا بوس ورىنعا بيلەت ساتىپ الۋ ءۇشىن كەزەككە تۇرا الادى. بۇل قىزمەت bilet.railways.kz سايتىندا نەمەسە «جولاۋشىلار تاسىمالى» اق بيلەت كاسسالارىندا اقىسىز نەگىزدە قول جەتىمدى.
قازىرگى ۋاقىتتا ۇلتتىق تاسىمالداۋشى جىلجىمالى قۇرامدى جازعى تاسىمالداۋعا بەلسەندى دايىنداۋدا. جەلدەتۋ جانە اۋانى باپتاۋ جۇيەلەرىن قايتا كونسەرۆاسيالاۋ، اۋا سۇزگىلەرىن اۋىستىرۋ، سۋمەن جابدىقتاۋ جۇيەسىن تازارتۋ جانە دەزينفەكسيالاۋ، ۆاگونداردىڭ ەلەكتر جابدىقتارىن تەكسەرۋ، تامبۋرلاردى، تيتانداردى، جىلىتۋ جۇيەلەرىنىڭ قۇبىرلارىن جانە باسقا دا بولشەكتەردى سىرلاۋ، سونداي-اق، ۆاگونداردىڭ شاناقتارىن سىرتقى جۋۋ بويىنشا جۇمىستار جۇرگىزىلۋدە.
كەڭەستە پاۆلودار، شىمكەنت جانە قىزىلوردا قالالارىنان الاكول كولىنە دەيىن ءبىرجولعى پويىزداردى ۇيىمداستىرۋ، تۋروپەراتورلاردىڭ بيلەتتەردى جونەلتۋگە دەيىن 180 تاۋلىكتەن باستاپ برونداۋ جۇمىستارىن جۇرگىزۋ، ينتەرمودالدىق تاسىمالداردى دامىتۋ بويىنشا ىنتىماقتاستىق ماسەلەلەرى تالقىلاندى.
«جولاۋشىلار تاسىمالى» اق تۋروپەراتورلارمەن تۇراقتى نەگىزدە كەڭەستەر وتكىزەدى. بيىل بۇنداي كەزدەسۋ ەكىنشى رەت ۇيىمداستىرىلدى.