20 جاستاعى الماتىلىق مانەرلەپ سىرعاناۋشى ميحايل شايدوروۆ جاقىندا عانا حاربيندەگى ازيا ويىندارىندا ءۇشىنشى ناتيجە كورسەتكەن ەدى. ەندى مىنە، سەۋلدە «ءتورت قۇرلىق» تۋرنيرىندە الدىمەن قىسقا باعدارلامانى، سودان كەيىن ەرىكتى باعدارلامانى جەڭىپ الدى. سونداي-اق، ول ءوز ونەرىمەن جارىستىڭ شىمىلدىعىن جاپتى.
العاش رەت جاس جىگىت التى جاسىندا كونكي تەبە باستادى. مانەرلەپ سىرعاناۋدان رەسپۋبليكانىڭ بىرنەشە دۇركىن چەمپيونى اتانعان ول جاتتىعۋدى اكەسى ستانيسلاۆ شايدوروۆتىڭ باسشىلىعىمەن باستادى. سودان كەيىن 2018 جىلى سوچيدەگى جاڭا جاتتىقتىرۋشىعا اۋىسادى. بۇگىندە ول رەسەيدەن كەلگەن ءبىرىنشى وليمپيادا چەمپيونى الەكسەي ۋرمانوۆتىڭ قولاستىندا جاتتىعادى. شايدوروۆ – ۋرمانوۆ تاندەمىن ءقازىر سپورت سۇيەرقاۋىم جاقسى بىلەدى. العاشقى جەتىستىك 2022 جىلعى جاسوسپىرىمدەر اراسىنداعى الەم چەمپيوناتىندا بولدى. سودان كەيىن قازاقستاندىق كۇمىس جۇلدەگەر اتانىپ، ەكى قويىلىمنىڭ ناتيجەسى بويىنشا امەريكالىق يليا مالينيننەن جەڭىلىپ قالدى. ميحايل بۇعان دەيىن ەكى جىل قاتارىنان «ءتورت قۇرلىق» تۋرنيرىندە بەسىنشى ورىنعا تۇراقتاعان ەدى، 2024 جىلى 6-ورىن ناتيجەسىن كورسەتتى.
سونىمەن قاتار، ول ەرەسەكتەر اراسىنداعى ءۇش الەم چەمپيوناتىنا قاتىسقان سپورتشى. سوڭعى ەكەۋىندە ميحايل پلانەتانىڭ ۇزدىك 14 سپورتشىسىنىڭ قاتارىنا ەنىپ، ەكى رەت گران-پري جۇلدەگەرى اتاندى. بيىلعى جىل جەرلەسىمىز ءۇشىن ءساتتى باستالعانىن جانكۇيەر قاۋىم جاقسى بىلەدى. كوپتەگەن ساراپشىلار جاقىندا ازيا ويىندارىنىڭ جەڭىمپازى اتانعان چحان چجۋن حۆانعا ارتىقشىلىق بەرگەن ەدى. مۇز يەسىنىڭ دەڭگەيىنەن اسىپ ءتۇسۋ قيىننىڭ قيىنى. الايدا، قازاقستاندىق مانەرلەپ سىرعاناۋشىعا مۋزىكانى قاتەلەسىپ قويۋ دا كەدەرگى بولمادى. جارىستا ونىڭ كومپوزيسياسى قويىلمادى. قازىلار القاسىمەن سوزگە كەلۋگە تۋرا كەلدى. ونىڭ مۋزىكاسى ويناعان كەزدە، ول ءوزىنىڭ باعدارلاماسىن ەكى كۆادراتتى، سونىڭ ىشىندە كۆادرات لۋستى (بارلىق كونكي تەبۋشىلەر ورىنداۋعا باتىلى جەتپەيتىن كۇردەلى سەكىرۋ) ورىنداي وتىرىپ، ءمىنسىز ورىندادى. سونىمەن قاتار، ەرەكشە اكسەل جانە باسقا دا كومپونەنتتەر ورىندالدى. بۇل ونىڭ جوعارى باعا جيناۋىنا مۇمكىندىك بەردى. ميحايل شايدوروۆتىڭ مانسابىنداعى العاشقى ءىرى جەڭىس. ايتپاقشى، وسىدان تۋرا 10 جىل بۇرىن ءدال وسى ارەنادا تاعى ءبىر الماتىلىق دەنيس تەن جەڭىمپاز اتانعان ەدى. وزىنە دەيىنگى سپورتشىنىڭ وسىنداي جەتىستىگىن ەسكە العان ميحايل تۋرنير الدىندا: «دەنيس الەمگە قازاقستاندا مانەرلەپ سىرعاناۋ بار ەكەنىن پاش ەتتى. ەندى مەنىڭ دە جەر جاھانعا بۇل تۋرالى جاريالاۋىما مۇمكىندىك بار» دەگەن ەدى.
ميحايل قازاقستاندا جاڭا چەمپيوندار ءوسىپ كەلە جاتقانىن تاعى ءبىر دالەلدەدى.