ۇلتتىق ۇلان قاتارىنا وتان الدىنداعى بورىشىن وتەۋگە كەلىپ، ومىرلىك جولىن اسكەري قىزمەتپەن بايلانىستىرۋدى شەشكەن بالعىن ايدىننىڭ تاعدىرى ءدال وسىلاي قالىپتاستى. ول ءۇشىن مەرزىمدى اسكەري قىزمەت ءبىر جىلدان عانا تۇرماي، كاسىبي جانە تۇلعالىق ءوسۋدىڭ، سانالى تاڭداۋدىڭ باستاۋى بولدى.
پرەزيدەنت جاريالاعان جۇمىسشى ماماندىقتار جىلى اياسىندا ق ر ءىىم ۇلتتىق ۇلانى قوعامدىق ءتارتىپتى قامتاماسىز ەتۋ مىندەتتەرىن ورىنداۋمەن قاتار، جاس مامانداردىڭ ءوز ارمان-ماقساتتارىن جۇزەگە اسىرۋىنا ناقتى مۇمكىندىكتەر جاساپ كەلەدى.
"وڭتۇستىك" وڭىرلىك قولباسشىلىعىنىڭ 5513 اسكەري بولىمىندە قىزمەت اتقاراتىن ۇلاندىقتىڭ ءومىر جولى – ءسوزىمىزدىڭ ايقىن دالەلى.
اسكەرگە تالدىقورعان قالاسىنان شاقىرتىلعان 25 جاستاعى بالعىن ايدىن تاراز قالاسىنداعى 5513 اسكەري بولىمىنە بىردەن كاسىبي دايىندىقپەن كەلدى. سەبەبى ول – سەمەي مەديسينالىق ۋنيۆەرسيتەتىندە العان جەتى جىلدىق ءبىلىمى مەن دارىگەر-تەراپيەۆت ديپلومى بار مامان ەدى.
العاشقى التى ايدا بالعىن تاراز قالاسىنىڭ كوشەلەرىندە قوعامدىق ءتارتىپتى قامتاماسىز ەتىپ، پاترۋلدىك قىزمەت اتقاردى. ءدال وسى كەزەڭدە اسكەري ورتادا ءوز ءبىلىمىنىڭ قاجەت ەكەنىن ءتۇسىنىپ، بالعىن ايدىن ۇلتتىق ۇلان قاتارىندا كەلىسىمشارت نەگىزىندە قىزمەت ەتۋگە شەشىم قابىلدادى.
اسكەري ءبولىم باسشىلىعى جاس ماماننىڭ تاڭداۋى مەن كاسىبي دايىندىعىن ەسكەرىپ، ونىڭ جاۋاپكەرشىلىگى مەن ىنتاسىن جوعارى باعالادى. بۇگىندە بالعىن ايدىن اسكەري ءبولىمنىڭ مەديسينالىق پۋنكتىنىڭ باستىعى لاۋازىمىن اتقارادى.
ونىڭ نەگىزگى مىندەتى — جەكە قۇرامنىڭ دەنساۋلىعىن قاداعالاۋ، اسكەري قىزمەتشىلەردىڭ ساۋىعىپ، قاتارعا تەز ورالۋىنا جاعداي جاساۋ. ول بۇل مىندەتتەردى دارىگەرلىك دالدىك پەن اسكەري ءتارتىپتى ساقتاي وتىرىپ، ابىرويمەن ورىنداپ كەلەدى.
جاقىن ارادا بالعىن ايدىن ءوزىنىڭ ەڭ العاشقى وفيسەرلىك اسكەري شەنىن – لەيتەنانت الادى.
بۇل وقيعا – ءبىر رەتتىك مىسال ەمەس، ق ر ءىىم ۇلتتىق ۇلانىندا جولعا قويىلعان جۇيەلى جۇمىستىڭ ناتيجەسى. مۇندا مەرزىمدى اسكەري قىزمەت كاسىبي دامۋدىڭ باستاۋى بولىپ، ءتۇرلى ماماندىقتار اسكەردىڭ الەۋەتىن نىعايتاتىن ماڭىزدى رەسۋرسقا اينالادى.
ۇلتتىق ۇلان – ءبىلىم مەن تاجىريبەسى ۇشتاسىپ، اسكەري قىزمەتتى كەلىسىمشارت بويىنشا جالعاستىرۋ سانالى شەشىمگە ۇلاساتىن ورتا.