AMANAT پارتياسى فراكسياسىنىڭ مۇشەسى، ءماجىلىس دەپۋتاتى ەرلان سايروۆ پرەمەر-مينيسترى ولجاس بەكتەنوۆكە دەپۋتاتتىق ساۋال جولداپ، قوعامدا كۇشەيىپ بارا جاتقان رۋشىلدىق پەن جىكشىلدىكتى ناسيحاتتايتىن ترەندتەردى ۇلتتىق بىرلىككە ءقاۋىپ رەتىندە باعالادى، - دەپ حابارلايدى aqshamnews.kz ءتىلشىسى.
دەپۋتاتتىڭ ايتۋىنشا، تاۋەلسىزدىكتى ساقتاۋ ءۇشىن قوعامعا ەڭ كەرەگى – بىرلىك، تۇتاستىق جانە ىنتىماق. الايدا سوڭعى ۋاقىتتا الەۋمەتتىك جەلىلەر مەن مادەني ورتادا كەرىسىنشە حالىقتى جىكتەۋگە بەيىم ۇردىستەر بەلەڭ الىپ بارادى.
"رۋ اتاۋىن برەندكە اينالدىرۋ" ءقاۋىپتى تەندەنسياعا ۇلاسۋى مۇمكىن
ساۋالدا جەكەلەگەن كونتەنت وندىرۋشىلەر مەن كاسىپكەرلەردىڭ رۋ اتاۋىن كۇندەلىكتى تۇتىناتىن ونىمدەرگە (فۋتبولكا، شاپان جانە ت.ب.) جازىپ، ونى "برەند"، "ماركەتينگتىك ءونىم" رەتىندە ساتۋى سىنعا الىنادى. دەپۋتات مۇنداي ارەكەتتەردىڭ جاستار اراسىندا رۋشىلدىق پسيحولوگيانى كۇشەيتىپ، ۇلتتىق تۇتاستىققا سىزات ءتۇسىرۋى مۇمكىن ەكەنىن اتاپ وتەدى.
سونداي-اق، دەپۋتاتتىڭ مالىمدەۋىنشە، بۇل ءۇردىس كينو سالاسىنا دا جەتكەن: رۋ سالىستىرۋ، كەمسىتۋ ەلەمەنتتەرى بار فيلمدەردىڭ پروكاتقا شىعۋى قوعامداعى سەزىمتال تاقىرىپتى كوممەرسيالىق قۇرالعا اينالدىرۋعا اكەلۋى ىقتيمال.
"تۆورچەستۆولىق بوستاندىق قاجەت. ءبىراق ول ۇلتتىڭ بىرلىگىن بۇزىپ، مەملەكەتتىلىكتىڭ تامىرىن قيۋعا قابىلەتتى دەڭگەيگە شىقپاۋى ءتيىس"، – دەلىنەدى ساۋالدا.
دەپۋتات ۇسىنعان 3 ناقتى شارا
ەرلان سايروۆ قوعامداعى رۋشىلدىقتى كۇشەيتەتىن يدەولوگيالىق ونىمدەرگە توسقاۋىل قويۋ ءۇشىن ءبىرقاتار ينستيتۋسيونالدىق قادام ۇسىنادى:
-
كينوپروكاتقا شىعاتىن وتاندىق فيلمدەردى الدىن الا ساراپتايتىن تۇراقتى كوميسسيا قۇرۋ
– كوركەمدىك-ەستەتيكالىق، يدەولوگيالىق جانە ۇلتتىق بىرلىك تۇرعىسىنان باعالايتىن تەتىك قاجەت ەكەنىن ايتادى. -
"ۇلتتىق كود"، "مادەني ەرەكشەلىك" ۇعىمدارىن جەلەۋ ەتىپ، قوعامدى بولشەكتەۋگە باعىتتالعان ارەكەتتەرگە ناقتى توسقاۋىل قويۋ
– رۋشىلدىق پەن جىكشىلدىكتى ناسيحاتتايتىن كونتەنتكە جۇيەلى تۇردە شەكتەۋ ەنگىزۋدى ۇسىنادى. -
بىرلىكتى نىعايتاتىن جالپىۇلتتىق كونتەنتتى كوبەيتۋ
– مادەنيەتتە جانە الەۋمەتتىك جەلىلەردە قازاقستان حالقىنىڭ تۇتاستىعىن ايقىندايتىن، "ءبىز قازاقپىز" ماعىناسىنا جاقىن كونتەنتتى ارتتىرۋ قاجەت ەكەنىن جەتكىزەدى.
"ۇلتتىڭ ەڭ سەزىمتال تاقىرىبى ويىنشىققا اينالماۋعا ءتيىس"
دەپۋتات ساۋالىندا رۋشىلدىقتى ۇلتتىڭ ىشىنەن ىرىتەتىن ءقاۋىپتى قۇبىلىس رەتىندە سيپاتتاپ، ونىڭ مەملەكەتتىك ويلاۋعا كەرى اسەر ەتەتىنىن العا تارتادى. بۇل رەتتە ابايدىڭ "اتانىڭ بالاسى بولما، ادامنىڭ بالاسى بول" دەگەن ءسوزىن مىسالعا كەلتىرىپ، ۇلت رەتىندە ىلگەرىلەۋدىڭ شارتى – ازاماتتىق تۇتاستىق ەكەنىن مەڭزەيدى.
ساۋال سوڭىندا مەملەكەت باسشىسىنىڭ "ءبارىمىز ءبىر ۇلت بولىپ ەڭبەك ەتۋىمىز كەرەك" دەگەن ۇستانىمى ەسكە سالىنىپ، ۇلتتىق بىرلىك مەملەكەت ساياساتىنىڭ وزەگى ەكەنى كورسەتىلەدى.