«ىلە-بالقاش» رەزەرۆاتىندا بۇقار بۇعىلارى كوبەيىپ كەلەدى

بۇقار بۇعىسى ق ر قىزىل كىتابىنا جانە حالىقارالىق قىزىل كىتاپقا ەنگىزىلگەن.

مەملەكەتتىك تابيعي رەزەرۆاتتقا تاعى دا بۇقار بۇعىلارى جىبەرىلدى. قاراشەڭگەل اڭشىلىق شارۋاشىلىعىنان «ىلە-بالقاش» رەزەرۆاتىنىڭ اۋماعىنا 61 بۇعى اكەلىندى. ءقازىر اتالعان جانۋاردىڭ جالپى سانى 150 باسقا جەتىپ وتىر، دەپ حابارلايدى Almaty-akshamy.kz ەgemen.kz cىلتەمە جاساپ.

جانۋارلاردىڭ قوزعالۋ اۋماعىن باقىلاۋ ماقساتىندا، ولاردىڭ جىبەرىلگەن جەرىنە 6 فوتوتۇزاق ورناتىلدى. سونداي-اق ءۇش بۇعىعا GPS سەزبەك ورناتىلعان قارعىباۋ تاعىلدى. اتالعان قۇرىلعىنىڭ جانۋارلارعا ەش زيانى جوق.

ەستەرىڭىزگە سالا كەتەيىك، بۇل بۇقار بۇعىلارىنىڭ «ىلە-بالقاش» رەزەرۆاتى اۋماعىنا ءتورتىنشى رەت جىبەرىلۋى – 2019 جىلى 5 بۇعى، 2020 جىلى 15 جانە بىلتىرعى جىلى 61 باس ورنالاستىرىلعان بولاتىن.

ايتا كەتەيىك، بۇقار بۇعىلارىنىڭ بالقاش اۋدانىنا ورالۋى، جولبارىستى قازاقستانعا جەرسىندىرۋ باعدارلاماسى اياسىندا ىسكە اسىرىلىپ وتىر. ونى ورمان شارۋاشىلىعى جانە جانۋارلار دۇنيەسى كوميتەتى دۇنيەجىزىلىك جابايى تابيعات قورىمەن (WWF) بىرلەسىپ، بۇۇدب قولداۋىمەن ىسكە اسىرادى.