كەشەگى وتكەن ۇلتتىق قۇرىلتايدا ەلدىڭ بۇگىنى مەن بولاشاعىنا تىكەلەي قاتىستى، كەزەك كۇتتىرمەيتىن، شىن مانىندە جالپىۇلتتىق ماڭىزى بار ماسەلەلەر تالقىلاندى. پرەزيدەنتىمىز قاسىم-جومارت توقايەۆ ۇلت بىرلىگىن ساقتاۋ، ەكونوميكانى زامان تالاپتارىنا ساي دامىتۋ، يدەولوگيالىق جۇمىستى جانداندىرۋ سياقتى كۇردەلى ماسەلەلەرگە ەرەكشە ءمان بەرگەنىنە بارشامىز كۋا بولدىق.
ساياسي تۇرعىدان العاندا، قوعامداعى تاتۋلىق پەن بىرلىك – رەفورمالاردىڭ تابىستى جۇزەگە اسۋىنىڭ كەپىلى. ۇلتتىق قۇرىلتايدىڭ ماقساتى دا وسى – حالىقتىڭ كوكەيىندەگى ماسەلەلەردى اشىق ايتىپ، ونىڭ شەشۋ جولدارىن قاراستىرۋ. پرەزيدەنت ۇسىنعان «الۋان ءتۇرلى پىكىر – ءبىرتۇتاس ۇلت» قاعيداتى ۇلتتىق قۇرىلتايدا ءوز كورىنىسىن تاپقانى – ءومىر شىندىعى. كەشەگى جيىندا ۇلتتىق قۇرىلتايدىڭ مۇشەسى رەتىندە ءوزىم دە ءسوز سويلەپ، رۋحاني سالانىڭ كوكەيكەستى ماسەلەلەرىنە توقتالدىم. باسقا دا ارىپتەستەر وزدەرىنە تيەسىلى سالالار بويىنشا ءوز پىكىرلەرىن ورتاعا سالدى.
ەكونوميكانىڭ جەتىستىكتەرىمەن قاتار وندا تالاي جىل بويىنا شەشىمىن تاپپاي، قوردالانىپ قالعان پروبلەمالار دا اشىق ايتىلدى. ءوزىم ءتانتى بولعان ءبىر جايت سول: ەكونوميكاداعى كۇرمەۋى قيىن ماسەلەلەرگە قاتىستى شەشىمدەر پوپۋليزمنەن مۇلدەم ادا، مەملەكەتتىڭ ستراتەگيالىق مۇددەلەرىنە ساي قابىلدانۋدا. قازىرگى، قارجى تاپشى كەزەڭدە مەملەكەتتىڭ ينۆەستيسيانى ءبىلىم، عىلىم، دەنساۋلىق ساقتاۋ جانە كولىك سالالارىنا جۇمساۋى – حالقىمىزدىڭ تۇرمىس ساپاسىن جاقسارتۋعا باعىتتالعان ماڭىزدى شەشىمدەر دەپ ويلايمىن. ادىلەتتى سالىق جۇيەسىن قالىپتاستىرۋ – قوعامداعى تابىس تەڭسىزدىگىن ازايتىپ، ەكونوميكامىزدى تۇراقتاندىرۋدىڭ نەگىزگى تەتىكتەرىنىڭ ءبىرى بولىپ تابىلاتىنى ءسوزسىز.
ۇلتتىق قۇرىلتايدا ۇلتىمىزدىڭ رۋحاني ءومىرىنىڭ سان سالالى ماسەلەلەرى تالقىلانۋى جاقسى داستۇرگە اينالىپ بارادى. بۇل جولعى جيىندا دا ادەبيەت، مادەنيەت پەن ونەر تاقىرىبى كەڭىنەن ءسوز بولدى. جانە دە پرەزيدەنتىمىزدىڭ وسى سالالارداعى جاعدايدان، وندا ورىن الىپ جاتقان تەندەنسيالار مەن جەكە وقيعالاردان حاباردار، ماعلۇماتى مول ەكەنىن بايقادىق. قۇرىلتايدا سيفرلاندىرۋدىڭ ۇلتتىق رۋحانياتتى ىلگەرىلەتۋدەگى ءرولى ەرەكشە اتاپ ءوتىلدى. اقپاراتتىق تەحنولوگيالاردى ءتيىمدى پايدالانۋ ارقىلى مادەني مۇرانى كەڭىنەن ناسيحاتتاۋ – زامان تالابى. بۇل باعىتتا ادەبيەت، ونەر جانە تاريحي جادىنى سيفرلىق كەڭىستىككە بەيىمدەۋ وتە-موتە وزەكتى دەپ ويلايمىن. بۇل شارۋاعا ءوز ارىپتەستەرىمەن بىرلەسە وتىرىپ، جازۋشىلار وداعى دا بەلسەنە ارالاسپاق.
پرەزيدەنتىمىز بيىل اتاپ وتىلەتىن اباي قۇنانباي ۇلىنىڭ 180 جىلدىعىنا جەكە توقتالدى. وسى داتاعا وراي جازۋشىلار وداعى دا اۋقىمدى جوسپارلاردى جۇزەگە اسىرماق. سونىڭ ءبىرى – ۇلى ويشىلدىڭ تۋعان كۇنىن قازاقستاننىڭ بارلىق وڭىرىندە ءبىر مەزەتتە، ونلاين فورماتتا اتاپ ءوتۋ. مۇنداي كەڭ اۋقىمدى ءىس-شارا تەك مەرەكەلىك سيپاتقا يە ەمەس، ول اباي الەمىنە تاعى ءبىر رەت تەرەڭ بويلاپ، ونىڭ رۋحاني مۇراسىن بۇگىنگى قوعاممەن، جاس ۇرپاقپەن بايلانىستىرۋدىڭ جولى بولماق. اتاپ ايتقاندا، ماحامبەت، جامبىل، اباي مەرەيتويلارى وسى جوبا اياسىندا اتاپ وتىلەتىن بولادى.
قورىتا ايتسام، ۇلتتىق قۇرىلتاي بۇگىندە حالىق پەن بيلىكتىڭ اراسىنداعى اشىق، جان-جاقتى دا تەرەڭ ديالوگ الاڭىنا اينالدى. ەندىگى جەردە وسى بيىك مىنبەدە ايتىلىپ، تالقىلانىپ، قولداۋ تاپقان يدەيالار مەن باستامالاردى جۇزەگە اسىرۋ بارشامىزدىڭ – قوعامنىڭ، بيلىك ينستيتۋتتارىنىڭ – مارتەبەلى مىندەتى دەپ سانايمىن.