1-ماۋسىم – بالالاردى حالىقارالىق قورعاۋ كۇنى قارساڭىندا «الاتاۋ» الەۋمەتتىك قىزمەت كورسەتۋ ورتالىعى «بايسەركە-اگرو» اگروحولدينگىنىڭ «قوبىلاندى» جىلقى زاۋىتىنىڭ ماماندارىمەن بىرلەسىپ، «سەنىم» الەۋمەتتىك قىزمەتتەر ورتالىعىنىڭ بالالارىنا قايىرىمدىلىق ءىس-شارا ۇيىمداستىردى.
مەرەكەلىك ءىس-شاراعا الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ، الەۋمەتتىك قىزمەت كورسەتۋ ورتالىقتارىنىڭ باسشىلارى، «قوبىلاندى» جىلقى زاۋىتى كەشەنىنىڭ قىزمەتكەرلەرى مەن ب ا ق وكىلدەرى جانە «الاتاۋ» جانە «سەنىم» ورتالىقتارىنىڭ تاربيەلەنۋشىلەرى قاتىستى.
مەرەكەلىك ءىس-شارا بارىسىندا «الاتاۋ» الەۋمەتتىك قىزمەت كورسەتۋ ورتالىعىنىڭ جازعى ەڭبەك جانە دەمالىس لاگەرى سالتاناتتى تۇردە اشىلىپ، تۇساۋى كەسىلدى.
راس، بۇگىنگى تاڭدا ايرىقشا كۇتىمگە مۇقتاج بالالارعا قولايلى ورتا قالىپتاستىرىپ، مەديسينالىق كومەك بەرۋ ءۇشىن مامانداندىرىلعان ساۋىقتىرۋ ورتالىقتارىنىڭ ماڭىزى زور.
«الاتاۋ» الەۋمەتتىك قىزمەت كورسەتۋ ورتالىعىنىڭ ديرەكتورى گۇلفايرۋز قاسىموۆانىڭ ايتۋىنشا، ورتالىقتا 18 بەن 40 ارالىعىنداعى دامۋىندا اۋىتقۋى بار 180 بالا ەم الىپ، تاربيەلەنىپ جاتىر.
– «الاتاۋ» الەۋمەتتىك قىزمەتتەر ورتالىعى 18 جاستان 40 جاسقا دەيىنگى دامۋىندا اۋىتقۋى بار بالالارعا ستاسيونارلىق ۇلگىدەگى مەديسينالىق–الەۋمەتتىك قىزمەت كورسەتەتىن مەكەمە. تاۋلىك بويى جۇمىس ىستەپ، 8 باعىتتا قىزمەت كورسەتەتىن ورتالىقتا سەرەبرالدى سال اۋرۋى، داۋن اۋرۋى، اۋىر جانە تەرەڭ اقىل-وي جەتكىلىكسىزدىگى، پسيحيكالىق جانە موتورلىق دامۋدىڭ كەشەۋىلدەۋى، ەپيلەپسيا دياگنوزدارىمەن اۋىراتىن بالالار ەمدەلەدى. ءبىزدىڭ ميسسيامىز، وسىنداي ەرەكشە قاجەتتىلىگى بار بالالاردىڭ قوعامنان تىس قالماي، ورتادا تاربيەلەنىپ، ءبىلىم الۋىنا، دەنساۋلىقتارىن جاقسارتۋعا جان-جاقتى قولداۋ كورسەتۋ. ءبىز بىلتىر «قوبىلاندى» يپپودرومىندا بالالاردى جىلقى تەراپياسىمەن ەمدەۋگە عانا اكەلەتىنبىز. بيىل وسى اۋماقتان جەر الىپ، جازعى ەڭبەك جانە دەمالىس لاگەرىن اشىپ وتىرمىز. بۇل جەرگە بالالار اعاش وتىرعىزىپ، كوكونىس ەگەدى. سودان كەيىن ولاردى وزدەرى باپتايدى، وسىرەدى، كۇتەدى. ال مىنا كيىز ۇيلەردە دەمالادى، وينايدى، – دەيدى ورتالىق باسشىسى.
ەرەكشە بالالارعا – ەرەكشە قولداۋ قاجەت. ويتكەنى ولار دا قوعامدا وزدەرىن ەركىن سەزىنۋى ءتيىس. بۇل باعىتتا الماتىدا از جۇمىس اتقارىلىپ جاتقان جوق. قالا بيلىگى تاراپىنان ەرەكشە كوڭىل ءبولىنىپ، قولداۋ كورسەتىلۋدە. گۇلفايرۋز قابدەن قىزىنىڭ ايتۋىنشا، وتكەن اپتادا الماتى قالاسىنىڭ اكىمى ەربولات دوسايەۆتىڭ قولداۋىمەن «الاتاۋ» ورتالىعىنىڭ 6 تاربيەلەنۋشىسى باسپانالى بولىپتى.
اشىق اسپان استىندا ۇيىمداستىرىلعان مەرەكەلىك كەشتە بالالارمەن بىرگە سۋرەت سالىپ، اڭگىمەلەسىپ وتىرعان الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاناتۇلىن اڭگىمەگە تارتتىق:
- بۇگىن، 1 ماۋسىم – حالىقارالىق بالالاردى قورعاۋ كۇنى قارساڭىندا باسقارمانىڭ قاراماعىنداعى «الاتاۋ» جانە «سەنىم» الەۋمەتتىك قىزمەت كورسەتۋ ورتالىقتارىندا تاربيەلەنىپ، ەم الىپ جاتقان بالالارعا ارناپ مەرەكەلىك ءىس-شارا ۇيىمداستىرىپ جاتىرمىز. بۇل ورتالىقتاردا دامۋىندا پسيحونيەۆرولوگيالىق اۋىتقۋلارى بار بالالار ەم الادى. مەرەكە قارساڭىندا «قوبىلاندى» اتپەن سەرۋەندەيتىن مەكەمەنىڭ قولداۋىمەن يپوتەراپيا، ەڭبەك تەراپياسىن قاراستىردىق، ودان باسقا مۇندا ولار ءۇشىن قىزىقتى باعدارلامالار مەن سىيلىقتار ۇلەستىرۋدى ۇيىمداستىردىق. ءبىزدىڭ ماقساتىمىز – وسىنداي ەرەكشە كۇتىمدى قاجەت ەتەتىن بالالارعا بارىنشا قولداۋ كورسەتۋ، - دەيدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جانات ۇلى.
«الاتاۋ» الەۋمەتتىك قىزمەتتەر ورتالىعى ديرەكتورىنىڭ الەۋمەتتىك جۇمىس جونىندەگى ورىنباسارى نازيرا مىقتىبەك قىزىنىڭ ايتۋىنشا، بۇل ءىس-شارانىڭ ماقساتى – بالالارعا كوتەرىڭكى كوڭىل-كۇي سىيلاپ، ولاردىڭ مەرەكەلەرگە ەموسيونالدى جاقسى كوزقاراسىن تۋدىرۋ، زەيىندى، شىعارماشىلىقتى دامىتۋ، تابيعات پەن جانۋارلارعا دەگەن سۇيىسپەنشىلىكتى وياتۋ.
– بۇگىنگى مەرەكەلىك شارانىڭ بالالار ءۇشىن پايداسى كوپ. وسىنداي باسقوسۋلار ولاردىڭ الەۋمەتتىك-قوعامدىق ومىرگە بەيىمدەلۋىنە جانە وزدەرى قاتارلاس بالدىرعاندارمەن ارالاسۋىنا سەپتىگىن تيگىزەدى. شەت ەلدەردە ەرەكشە بالالارعا قالىپتى كوزقاراس قالىپتاسقان. ال بىزدە ولارعا ۇركە قارايتىن جاندار كوپ. سوندىقتان، ەرەكشە بالالار قولداۋعا مۇقتاج، مەيىرىمگە ءزارۋ، - دەيدى ول.
ءىس-شارا بارىسىندا بالالار ورتالىقتىڭ پەداگوگ-سۋرەتشىلەرمەن ارت-الاڭدا سۋرەت سالىپ، وزدەرى تەاترلاندىرىلعان قويىلىم قويدى، انيماتورلاردىڭ قاتىسۋىمەن ءتۇرلى ويىندار وينادى. ودان كەيىن جىلقى زاۋىتىندا ەكسكۋرسيا جاساپ، اتقا مىنۋگە مۇمكىندىك الدى. قوناققا كەلگەن بالالاردىڭ بارلىعىنا تۇسكى اس بەرىلىپ، سىيلىقتار ۇيلەستىرىلدى. ۇيىمداستىرۋشىلاردىڭ ايتۋىنشا، بالالار مەرەكەسى ەرتەڭ ورتالىقتا كەڭ كولەمدە اتالىپ وتىلەدى.
